TSIM KEV XYIV FAB HAUV YUS CUAB YUS YIG

Hnub chiv tim 27 lub 12 hlis 2020 tas los no yog hnub Koom Txoos ua hmoov hwm Yim Neeg Ntshiab, Vaj Qhia Fas Ntshis Kus thiaj nthuav me ntsis lus tias Tswv Ntuj Leej Tub vam txog ib lub cuab yim neeg sov so xws li cov me nyuam sawv daws. Li ntawd, Yim Neeg Ntshiab thiaj yog piv txwv rau txhua tsev neeg.

Ib yam muaj txiaj ntsim tshaj hauv tsev neeg Nas Xas Les no mas yog ‘kev xyiv fab’, vim tus me nyuam Yes Xus tau niam Mab Liab txoj kev hlub thiab Yos Xes kev tu saib xyuas. Yog li Yes Xus thiaj pom txog Tswv Ntuj kev hlub mos nyoos.

“Peb sawv daws los yeej zoo li yim neeg hauv Nas Xas Les no.” Vaj Qhia ntuas ib tsoom ntseeg “Peb raug hu kom los paub txog lub cuab lub yig li txij ntsim.”

Vaj Qhia nthuav tias ib yim neeg tsum txhim tsa nyob saum kev sib nyiam sib hlub, tsum qhib plho mus rau qhov vam khom. Yam tseem ceeb tshaj mas yog tsev neeg ntawd tsum nquag thov Ntuj tsis tseg kom hauv lawv vaj tse muaj kev thaj yeeb, muaj kev sib zam, muaj kev sib hlub, thiab ruaj nreb rau Tswv Ntuj. Yog yim neeg twg ua li hais los no mas yim neeg ntawd yuav tau txais kev xyiv fab los ntawm Tswv Ntuj.

Vaj Qhia paub tias txhua yim neeg muaj kev kub ntxhov thiab muaj teeb meem vim peb yog tib neeg, vim peb lub zog tsis loj txaus; ces peb thiaj muaj tsov rog nyob hauv peb vaj peb tsev. Vaj Qhia thiaj li hais tias “Yog peb niaj hnub sib ntaus sib ceg nyob hauv peb yim neeg, mas peb yuav tsim kev thaj yeeb tsis tau. Txiv muaj 3 lo lus pub rau txhua yim li no: ‘Thov koj mog’, ‘Ua koj tsaug mog’, thiab lo tias ‘Kuv thov txim os’. Yog nej ua li 3 lo lus no, Txiv lees tias nej tsev neeg yuav nyob hauv kev xyiv fab mus li.”