TSIS MUAJ LWM YAM YUAV LOS TAM COV LAUS LUB CHAW TAU NYOB HAUV TXOJ KAB XWM CEV TXOJ KEV NTSEEG

Nyob hauv hnub tim 23 lub 3 hlis, Vaj Qhia Fas Ntshis Kus nthuav txog cov laus txoj kab xwm cev lawv txoj kev ntseeg hauv lub Koom Txoos pub rau cov hluas.

Cov lus hauv hnub no mas Vaj Qhia Fas Ntshis Kus tau lub tswv yim los ntawm Mais Xes txoj kev tuag.

Vaj Qhia hais rau tsoom ntseeg sawv daws hauv kem tsev Paj Lug 6 tias cov Yus Das txoj kev tsiv los xaus nrog Mais Xes txoj sia. Mais Xes tau pub ib txoj nkauj cav txog nws txoj kev ntseeg txog Tswv Ntuj rau tsoom sid.

Mais Xes txoj nkauj yog piav txog nws lub neej npuab Tswv Ntuj, tej xwm tshwm los raug tsoom neeg uas lawv tau tso siab rau Has Nplas Has tus Tswv Ntuj, His Xas Has tus Tswv Ntuj thiab Yas Kos tus Tswv Ntuj.

Mais Xes tseem nco txog Tswv Ntuj kev tu siab vim Tswv Ntuj haiv neeg tsis tso siab rau Tswv Ntuj.

Txawm tias Mais Xes muaj hnub nyoog 120 xyoo lawm, tsis kav nws tseem muaj peev xwm cev nws lub cuab tam ntseeg txog Tswv Ntuj no rau cov neeg tiam tom qab tau.

Vaj Qhia thiaj hais tias, niaj hnub no Koom Txoos thiaj ua tiag tshaj thiab cev txoj kev ntseeg rau lwm tus nyob hauv cov ntaub ntawv, cov xyam, thiab lwm yam xwm. Txawm li ntawd los, tsis muaj yam xwm twg yuav pom tseeb dua ib tug neeg twg piav nws txoj kev npuab Tswv Ntuj rau lwm tus mloog.

“Cov neeg laus muaj hnub nyoog ntev thiab lawv tau paj tshab ua tim khawv nyob hauv lawv lub neej, thiaj yog txoj hmoov zoo tsis muaj yam twg yuav los tam tau.”

Vaj Qhia hais ua piv txwv txog lub cuab tam nws tau txais los ntawm nws yawg yog kev ntxub thiab kev npau taws rau tsov rog hauv xyoo 1914, Vaj Qhia hais tias “Kuv yawg cev cov cuab tam no rau kuv, vim nws qhia txog kev raug txom nyem nyob hauv tsov rog. Tej no tsis yog kuv tau paub los tau kawm nyob hauv tej ntaub ntawv, yog kuv kawm ntawm kuv yawg ntiag tug los ntag.”

Vaj Qhia hais ntxiv tias “hnub no, hmoov tsis zoo uas tsis zoo li thaum ntawd lawm thiab peb xav tias cov pog yawg ntawd lawv tej lus raug peb tso pov tseg: tsis yog! Tsis yog li ntawd! Lawv yog cov neeg txoj kev nco txog uas muaj sia, cov hluas thiab cov me nyuam yaus yuav tau mloog lawv pog lawv yawg tham rau lawv.”

Yog li mas Vaj Qhia thiaj ntuas tias peb vam txog cov neeg laus kev thoob tsib thiab lawv kev pom los pab peb cov hluas tiam tshiab no kom lawv paub txog lub Koom Txoos tawm sab hauv tuaj, kom lawv txawj ua neej ncaj ncees rau Tswv Ntuj Lo Lus, kom lawv ruaj nreb rau lawv txoj kev vam khom thaum lawv raug dab phem ntxias thiab Tswv Ntuj tau sim lawv siab, thiab kom lawv txawj nyiam txawj khuv leej lawv cov kwv tij nkauj muam.

Vaj Qhia hais ntxiv tias nyob hauv niaj hnub no mas muaj ib yam tau ploj mus lawm, yog Koom Txoos cov txuj uas tau los ntawm kev mloog thiab ua tim khawv txog txoj kev ntseeg, thiab txoj sia nyob hauv ib pawg neeg ntseeg tau sib sau ua tib lub Koom Txoos txij thaum hauv paus los txog nyem no.

Thaum peb yog me nyuam ces peb kawm Tswv Ntuj Lo Lus hauv cov tsev qhia kev ntseeg; tab sis thaum peb ua neeg hluas mas peb kawm lub Koom Txoos ntawm tsev kawm ntawv thiab cov xwm thoob ntuj.

Yog peb saib hauv Ntawv Moo Zoo, peb pom tias lawv hais txog Huab Tais Yes Xus yam tsis zais tsis ntxiv dab tsi rau, lawv pias mus raws qhov tseeb uas lawv tau pom.

Tej yam no yog cov txwj laus hauv lub Koom Txoos cov paj tshab cev ib tiam dhau ib tiam los txog peb tiag neeg no txhais tes.

Yog li no, thaum peb piav txog kev ntseeg li keeb kwm mas peb yuav piav xws li Mais Xes txoj nkauj thiab zoo xws li cov Hauv Paus Xa Lus cov lus cim tseg hauv Ntawv Moo Zoo thiab Ntawv Hauj Lwm. Yog piav yam nco ntsoov txog Tswv Ntuj li koob hmoov thiab peb txoj kev qaug.