TSO SIAB RAU TSWV NTUJ

"Peb lub suab thov yog zoo li lub suab khob qhov rooj.
Yog peb xav kom luag qhib mas peb yuav khob ob peb lwm."
-Vaj Qhia Fas Ntshis Kus-
9-8-2020

Nyob hauv Ntawv Moo Zoo hauv Lis Piam 19 caij Nruab Xyoos yog hais txog Huab Tais Yes Xus mus ko taw saum nplaim dej. (MT.14:22-33) mas qhia peb kom tso yus tus kheej pov tseg, tig los tso siab rau Tswv Ntuj thaum peb raug kev sim thiab ntsib kev ntshai.
Ntawv Moo Zoo sau tias Huab Tais Yes Xus mus ko taw saum nplaim dej thaum tab tom los cua daj cua dub. Huab Tais Yes Xus hais kom Pob Zeb nqes los nrhiav hauv Huab Tais Yes Xus. Pob Zeb mus tau ob peb ruam ces txawm pib ntshai mas Pob Zeb thiaj tog rau hauv dej. Pob Zeb hu Huab Tais Yes Xus pab, Huab Tais Yes Xus cev tes los rub Pob Zeb tes thiab hais rau Pob Zeb tias : Neeg ntseeg tsawg, ua cas koj ua xyem xyav ?”
Vaj Qhia hais tias “Thaum peb ua xyem xyav thiab muaj kev ntshai los yog peb pom tias peb txoj sia tab tom qaug mas peb txhob txaj muag tsa suab thov Huab Tais Ntuj xws li Pob Zeb tau tsa sua hu kom Huab Tais Yes Xus pab.”
Vaj Qhia hais tias peb lub suab thov yog zoo li lub suab khob qhov rooj. Yog peb xav kom luag qhib mas peb yuav khob ob peb lwm.
Txuav ntxiv, Vaj Qhia ho hais txog Huab Tais Yes Xus tias yog Leej Txiv txhais tes uas tsis tso peb pov tseg, yog txhais tes muaj zog thiab xav pub yam zoo rau peb.
Vaj Qhia hais ntxiv tias Tswv Ntuj paub zoo txog peb txoj kev ntseeg tias peb muaj kev ntseeg tsawg thiab tsis muaj cuab kav taug tau Tswv Ntuj txoj kev. Yog li Huab Tais Yes Xus thiaj nqes los cawm peb, coj peb rov mus cuag Huab Tais Tswv Ntuj.
“Ua ntej peb yuav nrhiav Tswv Ntuj, mas Tswv Ntuj twb nrog nraim peb lawm.”
Vaj Qhia kom sawv daws ras tias lub nkoj hauv plawv cua daj cua dub ntawd ces yog lub Koom Txoos tus duab ntag, yog lub Koom Txoos kev raug ntxias thiab raug hiam. Muaj ntau zaus lub Koom Txoos raug ntxias kom xav tias lawv raug Tswv Ntuj tso pov tseg. Thaum zoo li ntawd, mas peb yuav ua tim khawv txog txoj kev ntseeg, kev nyiam thiab kev vam khom.