TSOOM LEEJ NTSHIAB CEV TES TOS TXAIS PEB

Vaj Qhia Fas Ntshis Kus ras txog tsoom Leej Ntshiab kev thov Ntuj rau peb sawv daws tias yog lawv tej kab xwm tsob hwb Tswv Ntuj kev npaj tseg.

Tim 7 lub 4 hlis xyoo 2021 no yog Hnub Plaub Hauv Caij Hla, Vaj Qhia Fas Ntshis Kus pib ntuas sawv daws tias thaum peb thov Ntuj mas tsis yog peb nyob tib leeg xwb, tiam sis yog peb nyob hauv ntiaj teb neeg cov lus thov Ntuj yav tag los, ziag no thiab yav tom ntej.

Peb koom nrog tsoom Leej Ntshiab thov Ntuj ua ke nyob hauv Leej Pleev lub cev uas yog lub Koom Txoos. Peb sib txoos thov Ntuj ces peb cov lus thov thiaj phwj dav tuaj. cov neeg ntseeg lawv faib lawv cov lus thov Ntuj nyob hauv cov kab sab pab pawg (Social network): piv txwv li ntawm cov tsev neeg mob, ntawm tej lub caij nyoog lom zem, los yog ntawm cov neeg tab tom nyob hauv kev txom nyem ntsiag to.

“Ib tug neeg txoj kev mob yog sawv daws txoj kev iab, ib tug neeg qhov zoo siab deeg mus txog sawv daws ntsws.” 

Txhua zaus thaum peb koom tes thiab qhib siab thov Ntuj mas peb yuav pom tsoom Leej Ntshiab sib txoos nrog peb thov Ntuj thiab lawv thov Tswv Ntuj pub rau peb.

Vaj Qhia ntuas ntxiv tias tsis muaj kev tu siab nyob hauv lub Koom Txoos uas yug los twm zeej, tsis muaj kua mog poob nyob hauv kev zam txim, vim sawv daws ua pa thiab koom ua ke nyob hauv tib lub txiaj ntsim.

Vaj Qhia piav tias peb kev hwm tsoom Leej Ntshiab ua rau peb haj yam nyob ze Huab Tais Yes Xus tus Tuam Leej Choj coj peb mus cuag Tswv Ntuj.

Dhau ntawd, tsoom Leej Ntshiab kuj ua tus piv txwv rau peb tias txawm peb yog ib tus neeg tsis muaj zog loj thiab peb muaj txhaum, los kev ntshiab huv kuj ci tuaj kaj peb tau. Lub sij hawm tsis tau lig rau peb tig los hloov siab tshiab. Nyob hauv Leej Pleev peb ntsuas tau tias muaj kev sib thooj siab koom ntsws nrog cov neeg peb nyiam peb hlub uas lawv tso peb tseg lawm, peb thiaj li thov Ntuj rau lawv tsis tseg.

Vaj Qhia hais txog qhov ntshiab huv tias yog txoj sia txoj kev taug, yog tau ntsib Huab Tais Yes Xus, tsis hais lub sij hawm ntev los luv. Qhov ntshiab huv yog ua tim khawv xws li tus Leej Ntshiab tuag ua tim khawv, tus txiv neej los tus poj niam uas pom Huab Tais Yes Xus ces nws raws Huab Tais Yes Xus qab mus. Li ntawd, hauv ntiaj teb no peb kuj yuav ntsib tsoom Leej Ntshiab nyob ib ncig peb thiab.

Vaj Qhia rov hais txog tsoom Leej Ntshiab tau tso ntiaj teb no tseg lawm tias lawv niaj hnub tsom kwm peb, thov Ntuj pub rau peb thiab peb los kuj cev lus thov Ntuj rau lawv.

Lawv nyob saum Tswv Ntuj lub Ceeb Tsheej, lawv cev tes rau peb kom peb thiaj tau txais Tswv Ntuj lub txiaj ntsim raws li peb vam.