TSOOM LEEJ NTSHIAB YOG TAS NRHO COV NTSEEG HAUV LUB KOOM TXOOS

Vaj Qhia Fas Ntshis Kus cov lus qhia hauv hnub tim 2 lub 2 hlis xyoo no (2022) yog hais txog tsoom Leej Ntshiab, thiab hais tias txhua tus neeg ntseeg hauv lub Koom Txoos lawv npuab Leej Pleev.

Nyob hauv Vaj Qhia Fas Ntshis Kus txoj hauj lwm qhia tsoom neeg ntseeg hauv Hnub Plaub, lis piam 4 caij Nyob Nruab Xyoos mas Vaj Qhia qhia tias tsoom Leej Ntshiab sib koom Ntuj lub txiaj ntsim, yog yam hais txog Tswv Ntuj kev nyiam.

Vaj Qhia ntsia pom tias muaj tej tus neeg lawv xav ua neej xws li cov Ntshiab tab sis lawv tsis muaj kev xav li ib tus neeg ntseeg.

Cov ntseeg yuav tso siab rau Tswv Ntuj tib tug xwb, lawv tsis tso siab rau lwm tus thiab tsis tso siab rau tej daim duab mlom. Vaj Qhia nthuav lo lus no tias “Txawm tias cov ntseeg yuav vam txog cov Ntshiab pab thov Ntuj rau lawv, tshwj xeeb yog niam Mab Liab, tab sis cov ntseeg saib kev tso siab rau Leej Pleev yog yam muaj nqes dua.”

Vaj Qhia nthuav ntxiv tias tsis yog cov Ntshiab ua hwj huam, lawv tsuas yog lub tais cug Tswv Ntuj txiaj ntsim xwb, yog li Tswv Ntuj txiaj ntsim thiaj ua hauj lwm nyob hauv lawv rau sawv daws pom.

Yog li, cov Ntshiab thiaj yog cov pab thov Ntuj rau peb, thiab cov Ntshiab ua qhov chaw Tswv Ntuj hliv txiaj ntsim rau peb.

Koom Txoos txoj kev ntseeg thiaj qhia tias Koom Txoos yog qhov chaw tsoom Leej Ntshiab sib koom Ntuj lub txiaj ntsim.

Vaj Qhia ntxiv tias Koom Txoos tseem yog qhov chaw cia rau cov neeg tau kev cawm nyob thiab.

“Tswv Ntuj kev nyiam yog Leej Pleev, tus txhiv peb hauv kev txhaum, txoj kev nyiam cawm peb hauv kev txom nyem thiab quaj ntsuag. Yog li Tswv Ntuj kev nyiam lub txiv thiaj yog peb kev ntshiab huv.”

Thaum muaj kev zoo siab mas sawv daws yuav tau zoo siab ua ke, thaum muaj kev tu siab mas sawv daws yuav koom tu siab; xws li Leej Ntshiab Paj Lug sau ntuas tsoom sid tias ‘neeg muaj tib lub cev xwb; tab sis muaj tes muaj taw, muaj ntau yam; txhua yam yog lub cev, txawm tias muaj ntau ces, los yeej yog tib lub cev xwb. Nyob hauv Leej Pleev kuj zoo li ntawd. Ntawm nej, mas nej yog Leej Pleev lub cev, nyias muaj nyias tug nyob hauv Leej Pleev.’ (1KLN 12: 12, 27)

Vaj Qhia rov tig los hais txog lo lus ‘tsoom Leej Ntshiab sib koom Ntuj lub txiaj ntsim’ tias yog hais txog cov ntseeg sawv daws muaj kev khaub zig kev sib chab sib chaws ua rau txoj kev tuag tsis muaj cuab kav cais sawv daws tau, txawm tias tus neeg ntawd lub cev tuag lawm, los lawv txawm sib koom txais Tswv Ntuj lub txiaj ntsim nrog cov muaj sia ua ke.

Li ntawd, tsoom Leej Ntshiab sib koom Ntuj lub txiaj ntsim thiaj yog hais txog cov ntseeg nyob ntiaj teb no thiab nyob saum qaum ntuj.

Vaj Qhia hais ntxiv tias peb muaj peev xwm tsim kev sib raug zoo nrog peb cov yawg koob hauv txoj kev ntseeg ces lawv yuav pab peb hauv peb txoj sia. Thaum peb thiab lawv muaj kev sib raug zoo, peb thiab lawv ua phooj ua ywg lawm, peb yuav paub tias thaum peb thov tus phooj ywg pab mas nws yuav pab peb.

Koom Txoos saib cov Leej Ntshiab ua tus coj kev, tshwj xeeb tshaj mas yog tus nkauj ntshiab Mab Liab thiab Leej Ntshiab Yos Xes.

“Peb yuav ua tsaug tsoom Leej Ntshiab tus tuav pov hwm peb, vim lawv lub npe peb siv, vim lub Koom Txoos peb nyob, vim thaj tsam peb tau ua neej, mas peb thiaj paub tias lawv npuab peb, nyob ze peb. Ces txog lub caij peb ntsib xwv txheej, peb thiaj vam txog lawv thov Ntuj pab.

Kev thov cov Ntshiab tsis yog khawv koob, tab sis yog nrog peb cov kwv tij coj lub neej ntshiab thiab tau mus nrog Tswv Ntuj nyob lawd sib tham xwb.