TSUAS KAWG TUS NEEG ME XWB THIAJ PAUB TXAIS TSWV NTUJ KEV NYIAM

Hnub Chiv tim 9 lub 7 hli 2023 Vaj Qhia Fas Ntshis Kus rov nthuav Ntawv Moo Zoo hauv Hnub Chiv rau tsoom neeg ntseeg tuaj sib txoos teev Ntuj raws zaj Tswv Ntuj tus Tshiab xa xov hauv Leej Ntshiab Pob Zeb lub tshav puam tias “Tsuas yog cov neeg me xwb thiaj yuav paub txais Tswv Ntuj.”

Nyob hauv Huab Tais Yes Xus cov hauj lwm, nws ua kom tus dig muag rov pom kev, tus mob ruas rov huv tuaj, tus pluag tau hnov lub moo zoo. Vaj Qhia hais tias cov hauj lwm no qhia dab tsi, yog qhia tias Tswv Ntuj ua hauj lwm nyob hauv lub ntiaj teb no.

Lub Moo Zoo hais meej kawg tias Tswv Ntuj pub nws rau ntiaj teb neeg pom nyob hauv cov hauj lwm cawm neeg thiab kho neeg nyob hauv kev nyiam kev hlub neeg.

Huab Tais Yes Xus ua nws Leej Txiv tsaug, vim Leej Txiv txoj kev nyiam thiab Leej Txiv cov hauj lwm nyob hauv kev nyiam.

Txawm li ntawd, Tswv Ntuj kuj tsis pub nws kev nyiam thiab nws cov hauj lwm rau cov neeg muab hlob, lawv pom. Cov neeg muab hlob, lawv tsa lawv cai, lawv saib tias lawv tseem ceeb dua txhua tus, lawv nrhiav lub koob meej rau lawv, lawv tsuas xav tias lawv ntse txaus lawm, lawv tsis yuav leej twg los qhia lawv lawm, lawv tsis saib Tswv Ntuj yog lawv txiv.

Vaj Qhia hais tias yog vim li ntawd, Huab Tais Yes Xus thiaj tsawm cov neeg hauv Kos Las Ntxis, Npes Xais Das, Kas Fas Naus; vim lawv muab hlob lawv tsis paub txais qhov loj tuaj ntawm Tswv Ntuj tuaj.

Huab Tais Yes Xus ua Leej Txiv tsaug, vim Leej Txiv pub cov neeg me to taub txog Tswv Ntuj, lawv qhib siab thiab ras txog Tswv Ntuj cov hauj lwm.

Vaj Qhia ntuas sawv daws kom muaj tus cuj pwm zoo li ntawd; yog ras txog Tswv Ntuj cov hauj lwm xws li tej me nyuam yaus thaum pom ib yam xwm dab tsi hloov tau lub ntiaj teb no, thiab yuav tau ua Tswv Ntuj tsaug txhua hnub vim cov hauj lwm Tswv Ntuj tau ua.