TSUAS YOG KEV HLUB XWB THIAJ DEEV THIAB HLOOV NEEG LUB SIAB TAU

Hnub Plaub hauv Lis Piam 30 Caij Nyob Nruab Xyoos, Vaj Qhia Fas Ntshis Kus rov xav txog Leej Ntuj Plig Ntshiab lub txiv.

Hnub tim 27 lub 10 hli 2021, Vaj Qhia rov tuaj nthuav tsab ntawv Nkas Las Tias ntxiv tias Leej Ntshiab Paj Lug ntuas cov ntseeg ntawd thiab ntuas peb tias kev cawm thiab kev ntseeg lub yis yog Huab Tais txoj kev tuag thiab sawv rov los.

Vaj Qhia ceeb toom tias niaj hnub no muaj neeg coob leej tseem tab tom nrhiav kev kaj siab hauv txoj kev teev hawm ntau dua nrhiav tus Tswv Ntuj muaj txoj sia thiab yog qhov tseeb, lawv muab cov kab ke thiab txoj cai los tam Tswv Ntuj txoj kev hlub chaw.

Yog li Leej Ntshiab Paj Lug thiaj thov kom cov ntseeg hauv Nkas Las Tias tig rov mus nrhiav yam cheem tsum, yog nrhiav tus Tswv Ntuj pub txoj sia rau peb nyob hauv Leej Pleev. Vaj Qhia nthuav tias yog kom peb tso peb rau ntawm Leej Pleev xub ntiag thiab hawm lub Cim Yug thaum peb hnov tias txoj xov hauv peb txoj sia sab ntsuj plig tab tom yuav ploj mus.

Thaum peb pom Leej Pleev raug ntsia saum tus Ntoo Cuam, Huab Tais Yes Xus yuav hloov peb siab ntsws kom peb nkag siab tias lub Moo Zoo yog pub rau sawv daws. Vim li no Vaj Qhia thiaj hais tias txoj sia hauv ib cheeb tsam raug txhim tsa dua tshiab nyob hauv Leej Ntuj Plig, txoj sia ua neeg ntseeg raug hloov dua tshiab thiab peb muaj cuab kav muaj feem xyuam koom ntau rog nyob hauv sab ntsuj plig tau.

Nyob ntawm no, Leej Ntshiab Paj Lug tau hais txog ‘cev nqaij cov hauj lwm’ thiab ‘lub txiv txi ntawm Leej Ntuj Plig.’ Vaj Qhia nthuas tias cev nqaij cov hauj lwm yog tus xeeb ceem tsis sib xws nrog Tswv Ntuj Leej Ntuj Plig. Leej Ntshiab Paj Lug tsis tau hais tias cev nqaij muaj kev phem, tab sis Leej Ntshiab Paj Lug tab tom ntuas tias cev nqaij yog ntiaj teb lub cuab tam txawj laus thiab txawj tuag, hos Leej Ntuj Plig pub txoj sia.

Cov neeg ntseeg Yes Xus raug hu los coj txoj sia raws kab ke ntxuav, yog coj mus cuag lub txiv txi hauv Leej Ntuj Plig, lub txiv ntawd yog: nyiam Ntuj, zoo siab ua neeg, nyob kaj lug, ua siab ntev, xyiv fab pab luag tej, ua siab zoo rau luag, tso siab rau luag, txawj hlub luag tej, txawj kav nws lub cev. (NLT5: 22-23)

Li ntawd, Vaj Qhia thiaj kom cov ntseeg sawv daws coj mus xav saib puas muaj tus xeeb ceem li hais no.

Vaj Qhia hais tias tus Hauv Paus Xa Lus cov lus no yog ib yam tsis yooj yim rau peb lub cuab pawg neeg vim qhov zoo nkauj hauv txoj kev ntseeg Huab Tais Yes Xus mas to taub tsis yooj yim yog muab txoj cai los kev tsim txiaj los ua tus qauv ntsuas.

Vim li no, Vaj Qhia Fas Ntshis Kus thiaj hais tias peb muaj txoj hauj lwm tshaj Leej Pleev txoj kev tuag thiab sawv rov los, txoj sia rov raug txhim tsa nyob hauv kev hlub cov pa. Vim kev hlub no xwb thiaj deev thiab hloov neeg lub siab tau.