TSWV NTUJ YEES TAWM RAU PEB POM NYOB HAUV KEV NYIAM

Vaj Qhia Fas Ntshis Kus hais tias Ntoo Cuam yog qhov chaw Huab Tais Yes Xus qhia txog kev nyiam kev hlub uas nws pub rau peb.
Nyob hauv hnub tim 8 lub 4 hlis no, Vaj Qhia caw peb sawv daws los thov Ntuj ua ke nyob ntawm tus Ntoo Cuam vim tus kab mob Covid-19
Vaj Qhia hais tias “Muaj ntau tus nug tias lub zim txwv peb ntsib xwv txheej no, Huab Tais Tswv Ntuj dua twg lawm? Ua cas Huab Tais Tswv Ntuj tsis daws tej teeb meem no mus?”
Vaj Qhia rov hais tias cov lus no kuj yog ib co lus peb hnov nyob hauv Lis Piam Ntshiab thiab, peb yuav pom tias cov neeg ntawd yog cov hu nkauj cav txog Huab Tais Yes Xus lub koob meej thiab yog cov tsa suab hais kom muab Huab Tais Yes Xus ntxia saum Ntoo Cuam.
Cov neeg raws Huab Tais Yes Xus qab pib ntshai, lawv tso Huab Tais Yes Xus tseg. Lawv xav tias Huab Tais Yes Xus tsis yog tus cawm seej, vim Tswv Ntuj yog tus muaj zog tas nrho thiab yog tus yeej tas txhua yam.
Vaj Qhia rov hais tias “Nej nco tus xab txheeb cov lus puas tau? Nws hais tias : Tus no yog Tswv Ntuj Leej Tub tiag.”
Nyob hauv Huab Tais Yes Xus kev tshaj lub Moo Zoo, thaum muaj neeg hais tias Huab Tais Yes Xus yog tus Vaj, mas Huab Tais Yes Xus sawv kev mus deb ntawm lawv. Huab Tais Yes Xus hais kom dab phem kaw qhov ncauj, thaum dab phem qhia tias Huab Tais Yes Xus yog Tswv Ntuj Leej Tub. Ua cas Huab Tais Yes Xus ua li ntawd?
Vaj Qhia teb tias Huab Tais Yes Xus tsis xav kom ib zeej tsoom ntxhov siab txog tus tseem Vaj thiab tus Vaj cuav. Tus tseem Vaj yog tus nyiam txoj kev tsis muab hlob, tus Vaj cuav yog tus quab yuam thiab tsa tus kheej siab dua cov.
Vaj Qhia rov nug sawv daws tias nyob hauv Caij Hla no, Huab Tais Yes Xus yees tawm rau peb pom nyob qhov twg? Puas yog saum tus Ntoo Cuam?
Ntoo Cuam yog Huab Tais Yes Xus lub theej kiab, yog qhov chaw Huab Tais Yes Xus qhia txog Tswv Ntuj txoj kev nyiam kev hlub. Huab Tais Yes Xus nthuav nws ob sab tes tos txais sawv daws. Huab Tais Yes Xus nyiam peb tsis yog nyob hauv nws cov lus xwb, tiam sis yog nyob hauv nws txoj kev tuag txhiv peb cov txim. Huab Tais Yes Xus tsis tau quab yuam peb kom ntseeg txog nws, tiam sis Huab Tais Yes Xus coj peb mus cuag kev twj lij.
Yog li, Caij Hla thiaj qhia peb tias Huab Tais Tswv Ntuj muaj peev xwm hloov txhua txhia yam kom tshiab tau. Li ntawd peb thiaj tso siab rau Huab Tais Ntuj tias txhua txhia yam yuav rov zoo tuaj.

Vam txog : Vaticannews.va/en
Tus txhais : Muas Lauj, Zoo Tswv Zov Yaj