TUS NEEG NPAJ SIAB TXAIS THIAB UA NEEG ME, NWS YUAV POM TSWV NTUJ

Hnub Chiv tim 30 lub 1 hlis 2022, Vaj Qhia Fas Ntshis Kus ntuas sawv daws kom ua neeg me thiab txaus siab raws Tswv Ntuj txoj kev.

Ntawv Moo Zoo hnub no yog Lus Kas Ntawv Moo Zoo (LK 4: 21-30) piav txog thaum Huab Tais Yes Xus pom tias cov neeg hauv lub zos nws hlob, lawv tsis kam txais nws cov lus thiab lawv tawm tsam nws, mas Vaj Qhia hais rau cov ntseeg tias cov ntseeg txog Yes Xus, lawv yuav ntseeg qhov zoo txawm tias yuav muaj tus tsis kam mloog thiab txais lawv xws li Yes Xus tau ntsib hauv Nas Xas Les.

Ntawv Moo Zoo hais tias hnub no Yes Xus hais txog qhov tseeb, tab sis tsoom sid xav pom Yes Xus ua hwj huam thiab qhia ib lub cim rau lawv. Lawv nkag siab yuav kev, lawv tsis kam txais cov lus tseeb. Huab Tais Yes Xus thiaj hais lo lus tias ‘tsis muaj ib tus yaj saub uas luag yuav txais nws zoo hauv lub zos nws hlob.’ (LK 4: 24)

Lo lus no txhais tias Huab Tais Yes Xus paub ntsoov tias nws yuav ua hauj lwm tsis tau nyob hauv Nas Xas Les, vim nws paub cov neeg hauv lub zos nws hlob zoo, nws paub tias lawv yuav tiv nws thiab tsis kam txais cov lus nws yuav hais.

Vaj Qhia thiaj hais tias yog Huab Tais Yes Xus twb paub ntsoov li ntawd, ua cas nws ho txiav siab mus hauv Nas Xas Les? Ua cas nws ho ua zoo rau cov neeg nws paub tias lawv yuav tsis txais nws?

Vaj Qhia tig los hais rau sawv daws tias cov lus no tej zaus peb kuj rov hais los nug peb thiab. Tab sis cov lus nug no pab kom peb nkag siab Tswv Ntuj zoo dua tuaj, li cas?

Peb nkag siab tias thaum peb kaw peb lub siab tsis kam txais Tswv Ntuj, Tswv Ntuj tsis tsum tsis cia li; Tswv Ntuj tsis thau txoj kev nyiam tawm ntawm peb.

Vaj Qhia nthuav ntxiv tias peb pom Tswv Ntuj txoj kev nyiam li no nyob hauv cov ua niam ua txiv, lawv hlub lawv me nyuam yam tsis muaj dab tsi los txwv tau txawm tias tus me nyuam tsis paub txog niam txiv lub txiaj ntsim. Me nyuam ua neeg tsis tsim txiaj los niam txiv yeej tsis tso tseg kev ua zoo rau tus me nyuam. Tswv Ntuj kev nyiam zoo li no thiab txawm loj dua no. Hnub no Tswv Ntuj hu peb los ntseeg qhov zoo thiab txhob nruam kev ua zoo.

Ntawv Moo Zoo muaj tej yam yuav pab kom peb tig xav. Huab Tais Yes Xus tau hais txog 2 tus pej kum neeg, yog tus poj ntsuam hauv Xas Les Tas thiab tus mob ruas hu ua Nas Maas.

Nkawd tau txais Tswv Ntuj cov yaj saub, yog Es Lias thiab Es Lis Xais. Yeej tsis yooj yim uas ib tus neeg twg yuav txais lwm haiv neeg li yaj saub, tab sis nkawd hla dhau qhov no. Nkawd yeem ua neeg me zoo siab txais thiab txaus siab mloog, ces nkawd tau kev cawm.

Yog li Vaj Qhia thiaj hais tias txoj kev ntseeg txhawv nyob hauv tus neeg npaj siab txais thiab yeem ua neeg me. Tus poj ntsuam thiab Nas Maas nkawd kam yuav Tswv Ntuj txoj kev thiab ua raws li Tswv Ntuj tus yaj saub hais; nkawd mloog, tsis ua siab txhav, thiab tsis kaw nkawd lub siab rau Tswv Ntuj.

Huab Tais Yes Xus ua raws li cov yaj saub tau ib txwm ua, Huab Tais Yes Xus tawm rau peb pom tsis yog zoo xws li peb yuav xav txog. Cov neeg nrhiav lub hwj huam, nrhiav tej lub cim; lawv yuav tsis pom Tswv Ntuj. Tus yuav pom thiab ntsib Tswv Ntuj yog tus txaus siab ua raws li Tswv Ntuj hais, tsis yws, tsis ua xyem xyav, tsis ua siab nkhaus.

Vaj Qhia rov ntuas tias “peb ua neeg ntseeg los tau ntev xyoo, peb xav tias peb paub Tswv Ntuj zoo lawm, tab sis Tswv Ntuj xav kom peb qhib siab thiab ua lub siab yooj yooj yim txais Tswv Ntuj xwb. Peb yuav thov niam Mab Liab tus tau ua ib tug piv txwv nyiam ua neeg me thiab txaus siab ua txhua yam raws Tswv Ntuj siab nyiam, kom nws pab qhia txoj kev txais Huab Tais Yes Xus tuaj nyob hauv peb.