TXAWM TIAS PEB MUAJ TXHAUM LOS TSWV NTUJ FOOM HMOOV ZOO RAU PEB

Hnub Plaub hauv lub lis piam 2 caij Tos Huab Tais no mas Vaj Qhia Fas Ntshis Kus nthuav txog Tswv Ntuj lo lus foom hmoov zoo hauv kev thov Ntuj. Vaj Qhia hais tias yam peb muab rov rau Tswv Ntuj yog Tswv Ntuj li lus foom koob foom hmoov. Peb ua li nyob hauv kev thov Ntuj cav txog Tswv Ntuj, hauv txoj kev nyiam thiab ua Ntuj tsaug.

Nyob hauv ntawv Hauv Paus mas peb yuav pom tias Ntuj lo lus foom hmoov zoo yog ib lub cim nyob hauv kev thov Ntuj. Thaum Tswv Ntuj tsim ntuj tsim teb, mas Tswv Ntuj foom lus zoo rau txoj sia.

Vaj Qhia nthuav lo lus ‘foom hmoov zoo’ yog txhais tias ‘hais tau zoo’. Li ntawd, Tswv Ntuj pom tias txhua yam nws tau ua ntawd yog zoo kawg, tseem ceeb tshaj mas yog txiv neej thiab poj niam.

Tab sis tau tsis ntev, ces txhua yam Tswv Ntuj tsim los ntawd pauv hloov tas, tib neeg tau ua txhaum rau Tswv Ntuj, tib neeg coj txoj kev tuag los rau ntiaj teb. Txawm li ntawd los tsis muaj yam twg yuav los rho tau lub keeb zoo uas Tswv Ntuj cog rau hauv neeg lub siab tau: yog lub peev xwm foom lus zoo thiab txais cov koob hmoov. Li ntawd, ntiaj teb kev vam khom thiaj tseem nyob hauv Tswv Ntuj lo lus foom hmoov zoo ntawd.

“Tswv Ntuj lo lus foom koob foom hmoov loj tshaj yog Yes Xus Pleev, yog Leej Lo Lus.” Vaj Qhia hais lub ntsiab rau sawv daws to taub, “Leej Txiv foom lus zoo rau peb, txawm tias peb muaj txhaum.”

Leej Ntshiab Paj Lug hais txog lo lus no tias: Kuv cav lus zoo txog Tswv Ntuj, peb tus Huab Tais Yes Xus Pleev Leej Txiv, vim nws foom hmoov zoo rau peb, thiab pub txiaj ntsim yug peb tus ntsuj plig, nws tau pub txhij pub txhua, nyob saum cov txheej ntuj, hauv Leej Pleev. (EFX1:3)

Vaj Qhia ntxiv zog rau sawv daws tias “Tsis muaj txoj kev txhaum twg yuav npog tau Leej Pleev tus duab nyob hauv peb tau. Tsis muaj txoj kev txhaum twg yuav ntxoov tau peb npaum li Leej Pleev tus ntxoov ntxoo.”

Vaj Qhia hais ntxiv tias txawm tias kev txhaum ua kom peb tus duab hloov txawv tab sis tus duab ntawd tseem nyob nraim hauv Tswv Ntuj kev khuv leej, tib neeg poob rau hauv kev txhaum ntev npaum cas los Tswv Ntuj ua siab ntev tos tib neeg qhib siab txais lo lus foom hmoov zoo ntawd.

“Tswv Ntuj zoo tam li niam thiab txiv: lawv hlub lawv cov me nyuam tsis tseg, txawm tias tus me nyuam yuav ua phem npaum cas.”

Vaj Qhia piav txog tej xwm li no “Txiv pom cov niam mus saib xyuas lawv cov me nyuam nyob hauv tsev loj faj. Lawv txoj kev hlub loj dua txoj kev poob ntsej muag vim muaj tus me nyuam raug txim nyob hauv nkuaj. Peb Leej Txiv Tswv Ntuj zoo xws li ntawd, peb yog nws cov me nyuam, peb muaj qab hau dua peb cov txhaum.”

Txawm peb tej me nyuam loj hlob tiav niam tiav txiv lawm los, nyob ntawm peb xub ntiag lawv txawm yog ib tug me nyuam yaus. Nyob ntawm Tswv Ntuj los yeej saib peb zoo li ntawd tib yam nkaus. Li ntawd, Tswv Ntuj thiaj muab txiaj ntsim rau peb tsis tseg. Txawm zoo thiab phem los Tswv Ntuj nyiam peb tib yam thiab tsis tso peb tseg.

Peb pom qhov xwm no nyob hauv zaj hais txog Ntxas Kais tus luag cav tias nws yog neeg txhaum. Txawm ib zeej tsoom ntsia Ntxas Kais yog tus neeg lo txhaum, tiam sis Huab Tais Yes Xus ntsia pom qhov zoo nyob hauv Ntxas Kais. Thiab vim Ntxas Kais xav pom Yes Xus ces kev cawm thiaj hloov Ntxas Kais lub siab thiab txoj sia.

“Huab Tais Yes Xus ntsia pom Leej Txiv lo lus foom hmoov zoo nyob hauv Ntxas Kais, yog ib lo lus tsis muaj dab tsi yuav los npog tau. Li ntawd Huab Tais Yes Xus thiaj rov muab lo lus foom hmoov zoo ntawd rov los hloov Ntxas Kais lub siab.”

Dua ntawd, Huab Tais Yes Xus twb qhia peb tias nws yuav los nyob hauv cov neeg tshaib plab, cov neeg tsis muaj dab tsi hnav, cov neeg nyob hauv tsev loj fab, thiab hauv cov neeg muaj mob; saib peb yuav ua li cas rau nws.

Vaj Qhia xaus tias Tswv Ntuj twb xub foom lus zoo rau peb txhua tus lawm, peb yuav rov muab cov lus ntawd cev rov qab rau Tswv Ntuj nyob hauv kev thov Ntuj, cav txog Ntuj, ua Ntuj tsaug thiab thov Ntuj rau txhua yam Tswv Ntuj tsim los.

“Cov me nyuad, peb yuav nyob ntsiag to ib me ntis xav txog peb kev hais lus phem, peb muab cev rau Tswv Ntuj, kom Tswv Ntuj pub txiaj ntsim los hloov peb kom peb tsuas muaj foom lus zoo rau lwm tus xwb.”