TXHOB NTSHAI TAB SIS NEJ YUAV ZOV HMOV

Vaj Qhia Fas Ntshis Kus txhawb siab kom sawv daws txhob ntshai vim peb txoj sia khov kho nyob hauv Tswv Ntuj kev nyiam thiab kev hlub, tiam sis peb tsum npaj kom txhij tas txwv, yog zov hmo thiab rau siab tsob hwb Tswv Ntuj thiab peb cov kwv tij.

Hnub no (tim 7 lub 8 hli 2022) Vaj Qhia nthuav txog Tswv Ntuj kev nyiam thiab hlub thiab cov lus thaum Huab Tais Yes Xus hais rau cov thwj tim kom txhob ntxhov siab vim peb txoj sia nyob nruaj hauv Tswv Ntuj txhais tes.

Vaj Qhia hais tias muaj qee zaus peb ua siab fab, ntxhov siab, tsis tso siab, ntshai tsam peb ntog los yog tsam tsis tau txais kev nyiam. Tej yam no ua rau peb nco txog tus kheej thiab xav nrhiav lub cuab tam los yug peb lub neej kom nyob nruaj nyob khov. Tab sis Huab Tais Yes Xus hais kom peb tso siab rau nws tias ‘txhob ntshai! Tso siab rau Leej Txiv tus yuav pub txhua yam rau koj mas. Leej Txiv twb pub Leej Tub rau koj tau, thiab Leej Txiv tseem raws nraim koj, saib xyuas koj.’

Txawm peb tso siab tias Huab Tais Yes Xus saib ntsoov peb, los peb txhob tsaug zog los yog zwm rau kev nkees, tiam sis peb tsum zov hmo tsis tseg.

Kev nyiam vam txog kev zov hmo, thiab peb tsum mob siab rau lwm tus neeg txoj kev vam thiab kev zoo, peb tsum mloog lawv thiab txais lawv.

Kev zov hmo thiab npaj tus kheej cia kom txhij tsis hais lub caij zoo los phem mas yog cov neeg ntseeg kev thoob tsib. Thiab Huab Tais Yes Xus ntuas peb tsis tseg kom tsum npaj kom txhij tos tus tswv yuav rov los vim peb tsis paub tias nws yuav los thaum twg.

Thaum peb lub neej yuav xaus mas Huab Tais Yes Xus yuav hais kom peb cev cov hauj lwm nws pub rau peb ua rov rau nws. Li ntawd, mas kev zov hmo thiaj yog txoj kab xwm, yog ua siab ncaj txuag thiab saib xyuas lub cuab tam Tswv Ntuj pub rau yus.

Vaj Qhia xav kom sawv daws nquag rov thim xav txog sawv daws txoj sia thiab yam Tswv Ntuj pub rau sawv daws saib, piv txwv li txoj kev ntseeg, lub cuab, kev txheeb ze, zej zos ib puag ncig. Thiab peb yuav tau nug tus kheej tias peb khaws tej yam no cia rau peb xwb los peb ntaus nqes tias yog lub paj tshab los ntawm Tswv Ntuj los.

Vaj Qhia txhawb siab rau sawv daws tias ‘peb taug txoj kev no mas txhob ntshai, vim Huab Tais Yes Xus nrog nraim peb yog tias peb npaj txhij zov hmo tas txwv.’