TXOJ KEV NYIAM YOG PEB LEEG HUAB TAIS LUB CIM MUAJ TXOJ SIA

Tim 30 lub 5 hlis xyoo 2021 no yog HNUB HWM PEB LEEG HUAB TAIS, Vaj Qhia Fas Ntshis Kus thiaj hais tias “Peb Leeg Huab Tais pab kom peb ras txog yam ntsuas tsis tau hauv txoj kev nyiam thiab qhov kaj tsom peb nyob hauv txoj kev peb taug.

Txhua hnub chiv mas Vaj Qhia yuav tawm tuaj nthuav Tswv Ntuj Lo Lus rau ib zeej tsoom nyob hauv lub tshav puam hwm Leej Ntshiab Pob Zeb tau mloog raws kab ke Tus Tshiab Xa Xov. Hnub no mas Vaj Qhia piav txog yam tob ntsuas tsis tau hauv ‘Peb Leeg Huab Tais’ tias yog ib yam neeg lub tswv yim ntsuas tsis tau, tiam sis neeg paub tias muaj tseeb tiag vim muaj nyob hauv neeg lub siab raws li Leej Ntshiab Zam tau hais nyob hauv nws phau ntawv Qhib Yav Tom Ntej tias: ‘Tswv Ntuj yog kev nyiam’.

Tswv Ntuj yog kev nyiam; yog Leej Txiv, Leej Tub thiab Leej Ntuj Plig Ntshiab koom ua ib tug Huab Tais.

Vaj Qhia nthuav tias “Leej Txiv rov qee nws los yug ua Leej Tub. Leej Tub rov cev nws rau Leej Txiv. Leej Txiv thiab Leej Tub txoj kev nyiam yog Leej Ntuj Plig Ntshiab.”

Vaj Qhia rov hais tias “Huab Tais Yes Xus yog tus qhib Peb Leeg Huab Tais yam tob ntsuas tsis tau no rau peb tau paub. Huab Tais Yes Xus ua kom peb pom Leej Txiv Tswv Ntuj tus khuv leej neeg lub ntsej muag nyob hauv cov hauj lwm cev Leej Tub rau peb. Leej Tub yog tseem tib neeg, yog Leej Lo Lus tuaj ntawm Leej Txiv tuaj.”

Huab Tais Yes Xus hais tias Leej Ntuj Plig Ntshiab yuav nqes los ua Leej Txiv thiab Leej Tub txoj hauj lwm txuas mus, Leej Ntuj Plig Ntshiab yog qhov tseeb tus ntsuj plig, yog tus ‘NPLIJ’ (Consoler) peb thiab ‘QHIA’ (Advocate) peb.

Kev tshaj lub Moo Zoo thiab cov ntseeg txoj hauj lwm, yuav nyob hauv kev sib koom ua ib ke (Unity) raws li lo lus tias ‘lub Moo Zoo yam zoo nkauj hu peb los muaj txoj sia thiab ua tim khawv nyob hauv peb sawv daws uas nyias sib txawv nyias.’

Vaj Qhia ntuas tias “Kev sib koom ua ib ke no, yog yam muaj qab hau rau cov ntseeg: vim kev sib koom tsuas yog tib txog kev muaj txoj sia xwb; kev sib koom ua ib ke yug hauv txoj kev nyiam, yug hauv Leej Txiv Tswv Ntuj kev khuv leej neeg, yug hauv Leej Tub Yes Xus txoj kev ncaj thiab yug hauv Leej Ntuj Plig Ntshiab kev nyob txawm hauv peb nruab siab los.”