UA TUS NEEG ME LI MAB LIAB UA

Nyob hauv HNUB HWM MAB LIAB MUS SAUM NTUJ xyoo no, Vaj Qhia Fas Ntshis Kus tshaj tias niam Mab Liab qhia kev mus saum Ntuj rau peb yog kom peb ‘txhob muab hlob’.

Tim 15 lub 8 hli yog hnub Koom Txoos Kav Tos Liv ua hmoov hwm Mab Liab mus saum Ntuj. Vaj Qhia Fas Ntshis Kus thiaj nthuav Ntawv Moo Zoo hauv hnub no tias ib yam zais ntshis nyob hauv niam Mab Liab yog tus xeeb ceem tsis muab hlob. Thiab vim Mab Liab tus cuj pwm ua ib tug neeg me no, mas Huab Tais Tswv Ntuj thiaj ntsia ntsoov Mab Liab. Tsis tas li, Vaj Qhia kuj ntuas tias neeg lub qhov muag faj tas vim neeg saib yam neeg ob lub qhov muag pom thiab kev muaj hwj chim xwb, neeg ntsia hla kev tsis muab hlob nyob hauv neeg tus cuj pwm.

“Tsis muab hlob yog yam ua kom Mab Liab tau mus saum Ntuj.” Vaj Qhia hais “Lo lus ‘tsis muab hlob’ (humble) yog hlav los ntawm lo lus tias ‘av’ (humus). Peb cov paj tshab los peb kev nplua nuj tsis tsa peb kom siab, tiam sis kev ua ib tug neeg me ti av, kev sib nyiam sib hlub, thiab ua Tswv Ntuj txoj hauj lwm thiaj yog yam tsa tib neeg kom siab tuaj.”

Txhais tias peb tsum rov soj ntsuam peb tus kheej thiab saib txhua yam peb ua nyob hauv peb txoj sia tias puas yog peb ua nyob hauv kev tsis muab hlob. Peb tsum rov nug peb tias puas yog peb ua hauj lwm kom tau lus qhuas, tau suab npe los peb puas rau siab ua txoj hauj lwm tsob hwb lwm tus ntxiv mus. Peb ua tus mloog li Mab Liab mloog, los peb nyiam hais kom lwm tus mloog peb thiab qhua txog peb. Peb yog tus tseb kev thaj yeeb, los peb yog tus tswj lwm tus?

Vaj Qhia hais tias tej lus no yog tej lus peb yuav nug peb tus kheej tas ib sid, tshwj xeeb tshaj mas yog thaum peb tsa muag ntsia niam Mab Liab thiab hais tias ‘Mab Liab ua neeg me, nws thiaj tau Ntuj Ceeb Tsheej ua nws tug, Mab Liab tsis muab hlob, nws thiaj tau txiaj ntsim puv siab.’

Li ntawd, Vaj Qhia thiaj ntuas kom cov ntseeg sawv daws saib kev tsis muab hlob yog thawj kauj ruam hauv kev taug txoj kev ntseeg. Cov ntseeg yuav coj lub siab pluag mas lawv thiaj yuav vam txog Tswv Ntuj, lawv thiaj tau Ntuj lub Ceeb Tsheej ua lawv cov paj tshab.

Vaj Qhia nco txog tus yawg Daas Tes cov lus cav txog niam Mab Liab tias ‘nkauj ntshiab Mab Liab tus neeg txheej qis, nws yog tus nyob siab dua zeej tsoom’, mas yog ib cov lus zoo nkauj ua kom peb ras tau tias Mab Liab ua nws lub neej xws li tsis yog ib tus neeg tseem ceeb dab tsi, tab sis Huab Tais Tswv Ntuj ntsia ntsoov nws, Huab Tais Tswv Ntuj cav txog nws kev tsis muab hlob, kev npaj tus kheej kom ntshiab thiab nws lub siab zoo tsis lo txhaum. Mab Liab thiaj raug nqa mus saum Ntuj tas nrho lub cev thiab tus plig.

Mab Liab tus yam ntxwv ua ib tug qauv rau peb yoog raws. Mab Liab txoj sia yog ib co xov vam khom rau peb tias Huab Tais Tswv Ntuj hu peb los txais cov koob hmoov li nws.

Hnub no yog hnub hwm Mab Liab mus saum Ntuj, yog li Vaj Qhia thiaj kom tsoom ntseeg sawv daws vam txog niam Mab Liab los koom nrog sawv daws taug txoj kev coj mus cuag Ntuj Ceeb Tsheej, kom sawv daws coj ib lub neej txhob muab hlob xws li niam Mab Liab.