XAIV TXOJ KEV NTSHIA HUV

Hnub chiv tim 1 lub 11 hlis tas los yog hnub hwm tsoom Leej Ntshiab, Vaj Qhia Fas Ntshis Kus thiaj hais txog Tswv Ntuj lub suab hu sawv daws.

Vaj Qhia hais tias tsoom Leej Ntshiab yog ib tug piv txwv qhia kom peb sawv daws muaj kev vam khom nyob hauv Leej Pleev kev sawv rov los. Thiab Vaj Qhia kom sawv daws xaiv qhov huv, ua siab zoo, kev khuv leej, tso siab rau Tswv Ntuj thiab tsob hwb kev ncaj ncees thiab kev thaj yeeb.

Hnub no Vaj Qhia Fas Ntshis Kus xav kom sawv daws cim zaj ‘txoj hmoov zoo’ nqe 2 thiab 3 cia, vim 2 nqe no yog txoj kev coj mus cuag qhov ntshiab.

Huab Tais Yes Xus cov lus qhia nyob hauv zaj txoj hmoov zoo nqe ob yog: Cov tau txoj hmoov zoo yog cov quaj ntsuag. Vaj Qhia hais tias raws li peb xav mas tus quaj ntsuag yuav muaj kev xyiv fab tau li cas. Tiam sis Huab Tais Yes Xus tau teb rau peb tias: Cov quaj ntsuag rau txoj kev txhaum thiab kev txom nyem, lawv tau txoj hmoov zoo yog tias lawv tso siab rau Huab Tais Tswv Ntuj vim Ntuj yuav nplij lawv.

“Lawv tsis ua siab txhav, tab sis lawv ua tiag nyiaj lawv kev txom nyem thiab ua siab ntev tos Tswv Ntuj. Lawv yuav tau kev nplij siab ntawm Tswv Ntuj.”

Nqe peb hauv zaj txoj hmoov zoo yog: Cov tau txoj hmoov zoo yog cov siab zoo, vim lawv yuav txais lub ntiaj teb los ua lawv tug. Vaj Qhia txhab lus tias peb yuav pom tias Huab Tais Yes Xus yog tus piv txwv rau peb raws li nws tau hais tseg tias “Nej kawm ntawm kuv mog, vim kuv siab zoo, kuv tsis muab hlob.” (MT11:29)

Vaj Qhia nthuav txog tus neeg siab zoo tias yog tus neeg paub yoog nws tus kheej, mloog lwm tus, hwm lwm tus txoj kev ua neej, kev vam thiab kev thov. Tus neeg siab zoo, tsis txo lwm tus thiab tsis yuam lwm tus.

Vaj Qhia hais ntxiv tias tus neeg siab zoo, yuav raug ntiaj teb saib tsis taus, tab sis nws yuav muaj txiaj ntsim nyob hauv Tswv Ntuj vim Huab Tais Tswv Ntuj yuav muab lub ntiaj teb los ua nws tug. lub ntiaj teb ntawd yog Ntuj Ceeb Tsheej. Yog lub ntiaj teb muaj txoj sia nyob mus li.

Yog li Vaj Qhia thiaj nqua hu sawv daws kom xaiv lub neej ua neeg ntshiab neeg huv, ua siab zoo thiab nyiam khuv leej lwm tus.

Kawg no, Vaj Qhia hais tias txoj kev tshaj lub Moo Zoo yog txoj kev cov Leej Ntshiab tau taug dua los lawm, thiaj tsim nyog peb yuav hwm txog lawv. Lawv yog tus piv txwv rau peb yoog raws.