YES XUS NTSIA PEB VIM NWS XAV TSA PEB LUB TSIM ROV SAWV

Nyob hauv tim 30 lub 10 hli 2022 ncaj rau Hnub Chiv lub lis piam 31 caij Nyob Nruab Xyoo, Ntawv Moo Zoo (LK 19: 1-10) hais txog tus nom sau se Ntxas Kais xav pom Huab Tais Yes Xus, ces nws thiaj nce tsob txiv cev kom tau pom.

Vaj Qhia xam pom tias Ntxas Kais yog ib tug nom sau se rau cov Los Mas, mas nws yeej yuav siv lub hwj chim ua nom no los noj tsoom pej xeem Yus Das nqi taub hau xwb xwb, yog li mas cov pej xeem hauv lub nroog Yes Lis Kos thiaj tsis nyiam Ntxas Kais thiab ntaus lub cim rau nws ris tias Ntxas Kais yog tus neeg muaj txhaum.

Vaj Qhia kuj xam pom tias Ntxas Kais muaj lub siab xav pom Huab Tais Yes Xus xws li sawv daws, txawm tias nws tsis tau paub Huab Tais Yes Xus. Yog li Ntxas Kais tus yam ntxwv no thiaj qhia tau rau peb neeg tiam no tias txhua yam nyob hauv peb txoj sia yuav tsis ploj mus li. Peb muaj peev xwm nrhiav ib qho chaw tseg cia rau peb pib lub neej tshiab, cia rau peb tau hloov siab tshiab.

Lus Kas Ntawv Moo Zoo piav tias Huab Tais Yes Xus tsa taub hau ntsia Ntxas Kais nyob saum tsob ntoo, ces Huab Tais Yes Xus hais rau Ntxas Kais tias “Ntxas Kais, koj nqes los sai, vim hnub no kuv yuav tsum mus so hauv koj tsev.”

Nqe lus no mas Vaj Qhia muab twm tias Tswv Ntuj tsis ua kom peb tau kev txaj muag thiab txiav txim rau peb. Tiam sis Tswv Ntuj yeem txo nws kom qis dua peb, nws ntxuav peb ob txhais taw, nws nyob hauv qhov qis tsa hau ntsia peb, thiab nws rov tsa peb lub tsim lub meej mom kom sawv tau. 

Vaj Qhia hais ntxiv tias “Ntiaj teb neeg nrhiav txoj kev cawm, ntawm Tswv Ntuj mas nws nrhiav tib neeg kom tau cawm neeg.”

Hais txog lub Moo Zoo hnub no, saib muaj qab hau dab tsi rau peb, Vaj Qhia ntuas zoo li no “Tswv Ntuj tsis saib txog tej yam phem peb tau ua yav dhau los, tiam sis yam Tswv Ntuj saib mas yog peb yuav hloov ua tus neeg zoo li cas. Txawm peb tsis muaj cuab kav tawm tsam tej yam tuaj raug peb tau, tiam sis Huab Tais Yes Xus hlub peb, nws ntsia ntsoov peb, thiab tos saib thaum twg peb yuav caw nws los nyob hauv peb lub tsev.”

Vaj Qhia hais ntxiv tias “Nyob hauv peb sawv daws, mas peb yuav ua zoo li ntawd thiab. Peb yuav thim rov los ntsia txog peb tus kheej thiab tig ntsia tus neeg tab tom ua tiag kom dim hauv lub neej ua tsis yog ua tsis ncaj, lub neej yuam kev.”

“Peb cov neeg ntseeg, peb tsum ntsia ntsoov Leej Pleev tus tsa tes los khawm peb, tus muab siab rau nrhiav cov yaj poob zoo.”