YES XUS QHOV TSIS MUAJ ZOG YOG LO LUS QHIA HAUV CAIJ YES XUS YUG

Hnub Plaub hauv Lis Piam 4 Caij Tos Huab Tais xyoo 2020 no Vaj Qhia Fas Ntshis Kus nqua hu cov ntseeg sawv daws kom ua hmoov tsuj xeeb Yes Xus Yug raws li txoj kev ntseeg, tsis yog ua vim yog ib qhov xwm lom zem xwb.

Lub Caij Yes Xus Yug no qhia peb sawv daws tias Tswv Ntuj tsis yog dauv muag ntsia peb thiab hla dhau peb mus, tiam sis yog Tswv Ntuj nqes los ua neeg xws li peb sawv daws. Qhov xwm no muaj qab hau rau tib neeg thiab rau ntiaj teb li liv xwm thiab kom peb ntsia hla kev mob nkees hauv tus sab foob sib kis ziag no mus.

Niaj hnub nyem no, kab ke ua hmoov tsuj xeeb Yes Xus Yug yog ib lub ntees rau ntiaj teb neeg lom zem, txawm tias haiv neeg twg los txoj kev teev hawm twg kuj xij. Tab sis nyob hauv cov neeg ntseeg Ntuj, mas lub ntees no yog ib qhov xwm qhia tias Tswv Ntuj tau pub kev kaj rau lub ntiaj teb, yog qhov pom kev nyob mus li, yog li peb thiaj tsis txhob muab peb mus khi rau tej yam tsis ruaj nreb. Li ntawd, peb cov ntseeg sawv daws thiaj yuav tsis txhob muab lub ntees no txo ua ib txoj kab ke lom zem los yog zoo siab thaum peb tau sib pauv tej paj tshab nrog lwm tus.

“Txiv tsis xav kom nej sawv daws muab tej paj tshab ntawd los saib ua yam muaj qab hau dua lub ntsiab hauv kev ntseeg. Txiv xav kom nej sawv daws cim ntsoov tias hnub Yes Xus Yug yog hnub Tswv Ntuj nqes los ua neeg thiab nqes los nyob hauv peb sawv daws.”

Vaj Qhia nthuav txog 2 yam tseeb;  qhov ib: nyob hauv keeb kwm, muaj tus txiv neej thiab poj niam lo txhaum, lawv nrhiav qhov tseeb, kev khuv leej, thiab kev cawm. Qhov ob: Tswv Ntuj kev zoo tau los nrhiav peb thiab qhia peb txog qhov tseeb hauv kev cawm thiab coj peb mus koom ua nws kwv tij thiab koom ib txog sia nrog Tswv Ntuj, qhov no yog lub txiaj ntsim ntshiab, tsis muaj yam twg yuav los pauv tau.

Huab Tais Yes Xus yug los nyob hauv yim neeg txom nyem, tsis muaj hwj cim dab tsi; yog ib yam qhia peb kom peb rhuav peb lub tswv yim phem tawm mus. Thaum peb pom tus me nyuam ntxim hlub, tus me nyuam pluag txom nyem no mas peb yuav tsis tso kom txoj kev qaug txoj kev swb los roos peb, los ua kom peb lub tswv yim sib tawg.

“Caij Yes Xus Yug qhia peb sawv daws kom pom tias Tswv Ntuj tsis tau thuam peb, tsis tau hla peb, tsis tau ntiab peb, tsis tau lam los hnav cev qaij tib neeg, tab sis Tswv Ntuj nyob txawm hauv tib neeg. Tswv Ntuj tsuas tso kev txhaum tib yam pov tseg xwb, dhau ntawd nws tsis tso li. Tswv Ntuj txaus siab txais txhua yam xws li ib tug tib neeg tau txais.”

Vaj Qhia nthuav tias Huab Tais Yes Xus qhov tsis muaj ib lub zog li no, yog ib txoj kev qhia vim yog qhov tsom txog Tswv Ntuj kev nyiam. Hmoov tsuj xeeb Yes Xus Yug thiaj yog lub ntees cav txog txoj kev nyiam nyob hauv Leej Pleev tus tsom kev kaj rau ntiaj teb neeg.

Vaj Qhia hais ib zaj lus ua piv txwv tias muaj tej tus kws txuj tau nrog Vaj Qhia sib tham txog cov tib neeg cuav uas lawv tau tsim tawm los. Lawv hais tias cov tib neeg cuav no ua tau ntau ntau yam muaj txiaj ntsim qab hau rau tib neeg. Vaj Qhia thiaj nug rov tias yog li ne muaj yam twg uas cov tib neeg cuav no ho ua tsis tau. Lawv sawv daws hais tias yam tib neeg cuav ua tsis tau yog lub siab hlub mos nyoos.

“Yam no yog yam Tswv Ntuj muab rau peb hauv hnub no- Tswv Ntuj nqes los hauv ntiaj teb kom neeg muaj lub siab hlub mos nyoos li Tswv Ntuj.”

Niaj hnub no, peb sawv daws xav tau kev hlub mos nyoog ntawm lwm tus, kom peb muaj siab loj hla dhau xwv txheej mas Vaj Qhia thiaj xaus tias “Kab mob ua kom peb sib nrug, tab sis tus me nyuam Yes Xus hauv lub dab nyuj ua kom peb rov qab los sib ze.”