YES XUS TIV THAIV, PAUB, THIAB NYIAM PEB

Vaj Qhia Fas Ntshis Kus hais lus nyob hauv Hnub Chiv Plaub hauv Caij Hla tias Huab Tais Yes Xus yog tus zoo tswv zov yaj, nws tiv thaiv, paub thiab nyiam peb ib leeg mus rau ib leeg.
Hnub Chiv tim 25 lub 4 hlis 2021, tsoom ntseeg sawv daws tuaj sib sau nyob hauv lub tshav puam hwm Leej Ntshiab Pob Zeb mloog Vaj Qhia nthuav Ntawv Moo Zoo raws li tus Hauv Paus Xa Lus Zam sau txog Huab Tais Yes Xus tias yog tus ‘Zoo Tswv Zov Yaj’.
Vaj Qhia nthuav tias tus ntiav zov mas nws ua txoj hauj lwm kom tau nyiaj xwb, tus tub zog tsis kub siab rau cov yaj. Thaum hma tuaj ces nws tso tes khiav. Tab sis Huab Tais Yes Xus mas yog tus tswv zov yaj, Huab Tais Yes Xus lo lus yog qhov pom kev tiv thaiv peb thiab pab peb kom dim hauv tej xwv txheej phem thiab txaus ntshai.
Huab Tais Yes Xus paub nws cov yaj, thiab cov yaj paub Huab Tais Yes Xus. Nyob ntawm Huab Tais Yes Xus mas peb tsis yog ib npoj neeg los ib pawg neeg coob coob, tiam sis peb yog peb. Leej Pleev tsim thiab cawm peb sawv daws. Huab Tais Yes Xus paub peb zoo dua lwm tus thiab nyob hauv Huab Tais Yes Xus mas peb yuav pom tus zoo tswv zov yaj uas cov yaj saub tau hais txog tus yam ntxwv txawm nkaus: nws txhawj xeeb txog nws cov yaj, nws sau nws cov yaj los nyob ua ib pab, nws saib xyuas cov yaj mob, nws kho cov yaj kom rov zoo tuaj.
Tshwj xeeb tshaj yog Huab Tais Yes Xus nyiam nws cov yaj. Li ntawd, Huab Tais Yes Xus thiaj siv nws txoj sia los pab nws cov yaj. Huab Tais Yes Xus yeem tuag saum Ntoo Cuam; Huab Tais Yes Xus kev nyiam xaiv tsis tau, Huab Tais Yes Xus kev nyiam puag sawv daws cia. Huab Tais Yes Xus xav kom peb sawv daws tau txais Leej Txiv kev nyiam thiab muaj txoj sia.
“Dhau ntawm cov ntseeg tuaj sib sau nyob ntawm no, txawm muaj ntau leej ua raws nraim Huab Tais Yes Xus tus piv txwv los yog tsis tau ua ib zaug li los kuj muaj. Tab sis tsis yog txhais tias lawv tsis yog Tswv Ntuj cov me nyuam, tsis yog Leej Pleev cov yaj.” Vaj Qhia ntuas “Cov kwv tij nkauj muam sawv daws, Huab Tais Yes Xus thaiv, paub thiab nyiam nws cov yaj ib tug mus rau ib tug.”