Yog peb ua raws li Huab Tais Yes Xus, mas peb tsis ceeb laj tseb qhov zoo

Ua ntej Vaj Qhia yuav coj sawv daws teev Ntuj raws zaj tus Tshiab xa xov nyob hauv Hnub Chiv lub lis piam 15 caij Nyob Nruab Xyoo, Vaj Qhia ntuas sawv daws kom ua raws Huab Tais Yes Xus tus piv txwv thiab txhob tso txoj hauj lwm tseb Tswv Ntuj Lo Lus pov tseg.

Hnub tim 16 lub 7 hli 2023 yog ncaj rau Hnub Chiv lub Lis Piam 15 caij Nyob Nruab Xyoo, Ntawv Moo Zoo yog piav txog Huab Tais Yes Xus hais zaj paj lug tus tseb nplej tawm mus tseb nplej hauv 4 yam av raws li Mas Tais Ntawv Moo Zoo (MT 13: 1-23). Vaj Qhia nthuav lub Moo Zoo hnub no rau tsoom neeg ntseeg sawv daws mloog nyob ntawm Leej Ntshiab Pob Zeb lub tshav puam tias txawm tias tib neeg muaj kev twj lij tias lawv yuav txais los tsis txais Tswv Ntuj Lo Lus thiab Huab Tais Yes Xus lub siab twm xeeb vim nws tso siab tias Tswv Ntuj Lo Lus yuav txi txiv hauv neeg lub siab tau, xws li cov noob nplej txhawv hauv daim av zoo.

Huab Tais Yes Xus lub siab twm xeeb vim Huab Tais Yes Xus yog tus nquag tseb nplej, Huab Tais Yes Xus muaj lub siab mos tsis ceeb laj tseb cov noob nplej rau hauv daim teb, txawm tias daim teb yuav muaj av tawv, muaj pob zeb, los yog muaj nroj fab; tsis kav Huab Tais Yes Xus vam khom tias yuav muaj tej lub noob nrhau cag loj hlob tau nyob hauv cov teb ntawd.

Vaj Qhia xav muab piv rau cov ua niam ua txiv vim lawv yog tus tseb txoj kev ntseeg rau lawv cov me nyuam. Vaj Qhia hais tias cov ua niam ua txiv txhob poob siab thaum pom tej me nyuam tsis to taub tej yam nkawd qhia rau lawv. Kav tsij tseb lub noob ntseeg mus, muaj ib hnub lub noob ntawd yuav nrhau tau cag ruaj nyob hauv cov me nyuam xwb.

Vaj Qhia muab piv rau cov tub ntxhais hluas mas Vaj Qhia hais tias kev muab siab rau teev Ntuj thiab npuab Tswv Ntuj Lo Lus yuav yog lub noob me me ntsia tsis pom, tab sis yog lawv muab tas txhua yam cev rau Huab Tais Yes Xus, mas Huab Tais Yes Xus yuav ua kom lub noob ntawd loj tuaj.

Vaj Qhia tseem ntuas cov hluas sawv daws kom muab sij hawm los qee pab cov neeg xav tau kev pab. Tej zaus zoo li yog yuam kev, tab sis qhov tseeb, lub sij hawm ntawd yog lub sij hawm ntshiab.

Muab piv rau cov Leej Choj, cov neeg ua hauj lwm fab kev ntseeg, mas Vaj Qhia ntuas lawv kom txhob poob siab thaum lawv tsis pom tias lawv kev tshaj Ntuj Lus hlob tuaj nyob hauv ib tug neeg twg.

Txhob hnov qab tias thaum peb tshaj Tswv Ntuj Lo Lus ntawd txawm tias yuav tsis pom muaj dab tsi tsheej xeeb tuaj, tiam sis qhov tseeb mas Leej Ntuj Plig Ntshiab tab tom ua hauj lwm thiab Tswv Ntuj lub Ceeb Tsheej tab tom loj hlob nyob hauv cov neeg tau mloog Tswv Ntuj Lo Lus.

Vaj Qhia xav kom sawv daws rov nug tus kheej tias kuv puas tau tseb qhov zoo los tsis tau?