YUAV NTSUAS KOM POM MEEJ TAU, MAS TSUM KHAUB ZIG TSWV NTUJ

Hnub Plaub lub lis piam 22 caij Nyob Nruab Xyoo, Vaj Qhia Fas Ntshis Kus pib qhia Ntuj kev cai zaj tshiab, yog hais txog ‘kev ntsuas kom pom meej’, thiab Vaj Qhia hais tias yog yus khaub zig Tswv Ntuj mas yus thiaj yuav txawj xaiv yam zoo tshaj rau yus lub neej.

Hnub tim 31 lub 8 hli 2022 Vaj Qhia Fas Ntshis Kus rov tuaj qhia Ntuj kev cai rau cov neeg ntseeg sawv daws dua, Vaj Qhia pib twm txog lo lus ‘ntsuas kom meej’ tias yog txhais li cas.

Vaj Qhia hais ntxiv tias sawv daws yuav ua dab tsi mas tsum ntsuas tsum xav kom meej tso, mas sawv daws thiaj yuav tau lub neej zoo ua; xws li thaum peb xaiv yuav txhiam xws, khaub ncaws, kev kawm txuj, xaiv hauj lwm, tsim kev sib raug zoo nrog lwm tus. Peb yuav pom tias txhua yam hauv peb lub neej mas peb tsum ntsuas kom meej xav kom txhij tso peb mam ua mam xaiv, kev khaub zig Tswv Ntuj zoo li ntawd thiab.

Nyob hauv Ntawv Moo Zoo peb pom tias Huab Tais Yes Xus muab yam hauj lwm hauv neeg lub neej los hais qhia txog kev ntsuas kom meej ntsia kom dav xav kom thoob, xws li hais txog kev xaiv cov ntses zoo, yuav lub npliag dej zoo, los yog thaum hais txog tus neeg pom lub hub nyiaj hub kub hauv daim teb. Yog li Vaj Qhia thiaj hais tias “kev ntsuas kom meej feeb kom pom dav thiaj yog kev xyaum yus lub tswv yim, yus kev txawj, thiab yus txoj kev xav kom yus muaj peev xwm txais tau lub cib fim. Li ntawd thaum peb txawj ntsuas txawj xav kom txhij kom txhua lawm mas peb thiaj yuav xaiv tau qhov zoo rau peb. Yam peb xaiv ntawd yuav muaj feem rau peb lub siab xav thiab, vim tias thaum peb xaiv tau qhov zoo mas peb yuav muaj kev xyiv fab loj.”

Vaj Qhia hais ntxiv tias Huab Tais Yes Xus muab Ntuj lub Ceeb Tsheej los ua qhov zoo tshaj yog tias peb ntsuas kom meej tag peb mam xaiv.

Hais txog lub swm txheej xaiv mas muaj ntau zaus peb xav tias qhov peb xaiv ntawd yog qhov zoo tab sis tom qab peb pom tias peb tau xaiv yuam kev. Muaj ntau zaus peb pom tias qhov zoo rau peb yog dab tsi tab sis peb tsis tuaj yeem xaiv yuav qhov zoo. Xws li peb pom nyob hauv Ntawv Ntshiab tias Tswv Ntuj tau qhia As Das thiab Es Vas ua neej nyob hauv kev xyiv fab, tiam sis nkawd tsis yeem mloog Tswv Ntuj hais.

Li ntawd mas Vaj Qhia thiaj ntuas sawv daws tias “Yog peb xav tau txoj sia, yog peb xav lom zem nrog peb txoj sia, peb yuav tau nco ntsoov tias peb yog yam Ntuj tau tsim los, peb tsis yog tus qauv cia ntsuas txog qhov zoo los phem, thiab peb yuav ras tias qhov peb xaiv ntawd yuav muaj feem rov los raug peb, raug lwm tus thiab rau lub qab ntuj. Peb muaj peev xwm yuav kho kom lub ntiaj teb no zoo nkauj tuaj los rhuav kom lub ntiaj teb txia ntshis ua kev tuag lub teb chaws suab puam.

Vaj Qhia ntuas ntxiv tias kev ntsuas kom pom meej no yog yam neeg yuav tsum muaj, mas neeg thiaj yuav paub txog neeg tus kheej thiab xaiv qhov zoo tshaj rau neeg lub neej tau. Tiam sis kev ntsuas kom pom meej no tsum nyob hauv kev khaub zig Tswv Ntuj vim tias Tswv Ntuj yog Leej Txiv thiab Tswv Ntuj tsis yuav tso peb pov tseg. Tswv Ntuj yuav pub tswv yim rau peb, yuav pab txhawb peb, yuav tos txais peb. Tswv Ntuj tsis tau yuam kom peb ua xis Tswv Ntuj siab. Qhov Tswv Ntuj tos nrhw ntawm peb tsuas yog ‘peb tig los nyiam Tswv Ntuj, los npuab Tswv Ntuj’.

Vaj Qhia xaus cov lus hauv ntu no tias “Tsuas yog kev nyiam xwb thiaj twj lij, yog li thaum peb kawm kom txawj ua neej nyob tau, peb thiaj yuav tsum txawj nyiam, thiab yog vim li no peb thiaj yuav tsum txawj ntsuas kom meej xav kom txij.”