ZES KEV NTSEEG KOM ROV CIG DUA TUAJ

Hnub Chiv tim 14 lub 8 hli 2022 no Vaj Qhia Fas Ntshis Kus ntuas tias Ntawv Moo Zoo txhawb kom peb hloov thiab yuav siab tshiab, Ntawv Moo Zoo puav tam li cov hluav taws ua kom peb sov, hlawv peb lub qia dub thiab txhib peb kom pub Tswv Ntuj kev nyiam rau lwm tus.

Cov lus hauv Hnub Chiv lub lis piam 20 caij Nyob Nruab Xyoo mas yog Huab Tais Yes Xus hais tias ‘Kuv coj ib co hluav taws tuaj rau lub ntiaj teb, kuv yeej xav kom cov hluav taws ntawd twb cig lawm.’ (LK 12: 49)

Huab Tais Yes Xus coj lub Moo Zoo, yog hais txog Tswv Ntuj kev nyiam peb txhua tus neeg, yog li mas Huab Tais Yes Xus thiaj hais tias lub Moo Zoo puav tam li yog cov hluav taws vim tias lo lus no yog ib lo lus ntxeev txoj kev qub, pab kom peb yeej peb lub qia dub thiab rhuav txoj kev vam txog kev txhaum mas peb thiaj tau txais lub neej tshiab nyob hauv Leej Pleev kev sawv rov los. Txhua yam yuav tsis zoo li qub ntxiv yog tias lub Moo Zoo nrhau cag nthaw kaus nyob hauv neeg lub siab, vim tias lub Moo Zoo yuav txhawb neeg kom pauv, hloov siab tshiab, thiab lub siab cig kub lug ces neeg yuav qhib siab txais Tswv Ntuj thiab cov kwv tij nkauj muam.

“Lub Moo Zoo zoo puav tam li cov hluav taws, yuav ua kom peb sov, yuav hlawv peb lub qia dub, yuav ua lub teeb tsom kev rau peb, yuav daws peb hauv kev ua qhev rau tej yam cuav.”

Vaj Qhia nthuav ntxiv tias Tswv Ntuj kev nyiam nyob puv hauv Huab Tais Yes Xus mas Huab Tais Yes Xus thiaj yeem muab nws txoj sia los txhiv sawv daws saum tus Ntoo Cuam. Leej Ntuj Plig Ntshiab nyob ntxaws hauv Huab Tais Yes Xus xws li cov hluav taws pom kev kaj thiab muaj ceem mas Huab Tais Yes Xus thiaj pub kev vam khom rau tus neeg poob zoo, rhuav daim ntsa zeb cais neeg, thiab kho tus neeg muaj kev ntseeg lub cev thiab tus plig kom rov huv tuaj.

Huab Tais Yes Xus lo lus yog nqua hu kom peb zes peb kev ntseeg kom rov cig tuaj dua. Qhov no tsis yog kom peb tau nyob zoo, tiam sis yog kom peb ua zoo li cov nplaim taws muaj sia, ces peb yuav feeb meej tas mus li txawm tias nyob hauv hmo tsaus nti.

Vaj Qhia ntuas kom sawv daws rov tig los nug tus kheej tias yus mob siab rau lub Moo Zoo npaum cas, yus puas nquag nyeem Ntawv Moo Zoo kom cov nplaim taws ua pov thawj cig nyob hauv yus los yog hauv lub Koom Txoos. Yus yuav nug yus tias Leej Ntuj Plig Ntshiab cov hluav taws puas cig nyob hauv yus, puas hlawv yus kom mob siab rau thov Ntuj thiab ua hauj lwm tsim koob hmoov.

“Kwv tij nkauj muam, nyias yuav xav hauv nyias siab saib peb puas yuav hais tau tias Tswv Ntuj kev nyiam hlawv kuv lub siab kub lug thiab kuv xav coj Tswv Ntuj kev nyiam mus cuag txhua tus, kom lawv pom Tswv Ntuj lub siab mos thiab kom lawv tau txais kev xyiv fab nyob hauv Huab Tais Yes Xus, mas lawv lub siab thiaj yuav su tuaj thiab lawv lub neej thiaj yuav zoo nkauj.”