ZOO SIAB LEES TXAIS TSWV NTUJ COV LUS HU PEB LOS HLOOV SIAB TSHIAB

Vaj Qhia Fas Ntshis Kus yaum peb kom zoo siab lees txais Huab Tais cov lus hu peb los hloov siab tshiab, khiav deb ntawm kev ua txhaum thiab qhib siab txais lub Moo Zoo.

Ua ntej Vaj Qhia yuav coj sawv daws teev Ntuj nyob hauv Hnub Chiv tim 20 lub 3 hlis 2022, Vaj Qhia tau nthuav Ntawv Moo Zoo lub lis piam 3 caij Plaub Caug rau sawv daws mloog yog cov lus thaum muaj ib pab neeg tuaj hais rau Huab Tais Yes Xus txog cov xwm txaus tu siab vim Pis Las Tos tau muab ib pab neeg nyob Nkas Lis Lais tua, thiab Huab Tais Yes Xus tau hais txog cov neeg raug tus pej thuam Xis Los Es vau los tsuam. (LK 13: 1-9)

Nyob hauv zaj no pom tias cov neeg ntawd lawv xav nug Yes Xus saib leej twg tsim nyog yuav raug tsawm thiab leej twg txhaum loj dua.

Vaj Qhia hais ntxiv tias niaj hnub no ntiaj teb neeg ntsib xwv txheej mas cov lus nug zoo li no kuj tshwm nyob hauv ntau leej, sawv daws xav tias puas yog Tswv Ntuj rau txim rau lub ntiaj teb ces ntiaj teb thiaj muaj tsov rog thiab kab mob sib kis li no, thiab ua cas Tswv Ntuj tsis tawm los cuam tshuam.

Li ntawd, Vaj Qhia thiaj ntuas kom sawv daws ceev faj thaum txoj kev phem tuaj nias tuaj roos peb lub tswv yim zoo li no, vim peb yuav tsis muaj peev xwm ntsia kom pom tseeb thiab nrhiav cov lus teb txog cov xwm tshwm sim ntawd, peb liam tias tej xwm los yog peb lub hmoov phem ntawd mas yog vim Tswv Ntuj.

Vaj Qhia ntxiv tias Tswv Ntuj tsis los cuam tshuam neeg cov hauj lwm kom xis Tswv Ntuj siab, tab sis Tswv Ntuj tsuas taw kev daws cov teeb meem rau tib neeg xwb.

Tswv Ntuj tsis hais tias tus neeg raug tej xwv txheej ntawd vim nws muaj txhaum loj dhau lwm tus mas nws thiaj raug xwm phem zoo li ntawd. Vaj Qhia muab saib rau nqe rau lo lus tias ‘kev phem tsis yog tawm hauv Tswv Ntuj tuaj’ vim ‘Tswv Ntuj tsis nplua peb xws li peb tau ua txhaum’ (NPN 103: 10), tab sis Tswv Ntuj pauj rau peb raws nws kev khuv leej neeg.

Vaj Qhia tau hais tias Huab Tais Yes Xus qhia kom peb rov tig los ntsia peb zoo li cas, mas peb thiaj yuav pom tias peb cov txhaum yog lub hauv paus rhuav kev npuab Tswv Ntuj los yog xaiv kev siv dag siv zog ua rau txoj kev phem tau tawm los. Huab Tais Yes Xus hais rau peb tias “yog nej tsis xav tig los hloov siab tshiab, mas nej yuav tuag ib yam li ntawd thiab.” (LK 13: 5)

Huab Tais Yes Xus hu kom peb hloov siab tshiab nyob hauv caij Plaub Caug no, peb qhib peb lub siab los hloov dua tshiab, khiav deb hauv kev phem, tso tseg kev ua txhaum, thiab zoo siab txais lub Moo Zoo vim nyob hauv lub Moo Zoo muaj kev nyiam thiab kev ua kwv ua tij, kev phem yuav tsis muaj ntxiv.

Kev hloov siab tshiab yog yam yooj yim heev, tab sis tus txheej txeem mas nyuaj kawg, vim peb nquag ua yuam kev thiab txhaum thiab ua rau peb me siab ces thaum kawg peb yeem swb rau txoj kev phem.

Tiam sis Ntawv Moo Zoo hnub no mas Huab Tais Yes Xus tau hais ib zaj paj lug txog Tswv Ntuj lub siab ntev, yog zaj paj lug hais txog tsob txiv ncuav pias tsis txi txiv, ces tus tub txib thov sij hawm cia rau nws tu tsob txiv ncuav pias no 1 xyoos ntxiv.

Vaj Qhia hais tias yam no yog Huab Tais txoj kab xwm ua hauj lwm nrog peb, nws pub lub sij hawm rau peb, nws tsis tag siab rau peb, thiab nws tsis qaug zog rau nws txoj kev tso siab rau peb.

“Cov kwv tij thiab nkauj muam sawv daws, Tswv Ntuj ntseeg peb! Tswv Ntuj tso siab rau peb thiab ua siab ntev saib ntsoov peb. Tswv Ntuj tsis me siab, tab sis Tswv Ntuj vam khom peb. Tswv Ntuj yog Leej Txiv thiab nws ntsia koj xws li ib leej txi. Tswv Ntuj tsis ntsia yam koj yuav tsum ua kom tsheej xeeb, tab sis Tswv Ntuj ntsia lub txiv uas koj yuav txi. Tswv Ntuj tsis saib qhov koj ua tsis tau, tab sis Tswv Ntuj txhawb kom koj muaj feem ua kom tau. Tswv Ntuj tsis khaws koj lub neej yav dhau los coj mus xav, tab sis Tswv Ntuj ua siab tawv siab ntev tos saib koj lub neej yav tom ntej.”