3 tug Txiv Plig Hmoob nyuam qhuav tsa tshiab, nyob hauv lub Cheeb Koom Txoos Huang Hoa, nyob Nyab Laj teb

Hnub tim 17 lub 8 hli 2023 no, muaj kev tsa 18 tus Txiv Plig tshiab nyob hauv lub tuam tsev teev Ntuj Son Loc, hauv lub Cheeb Koom Txoos Huang Hoa. Nyob hauv cov Txiv Plig uas txais lub Cim Tiag Tes ntawd, muaj 3 leeg yog Hmoob. Yog Tswv Qhia Dominic Hoang Minh Tien ua tswv cuab coj lub thaj txi Ntuj.

Hnub tim 17 lub 8 hli 2023 no, ua ntej yuav txog 8 teev sawv ntxov, muaj cov neeg ntseeg tuaj qhov txhia chaw tuaj sib koom li ntawm 1,000 tawm leej. Muaj cov Txiv Plig hauv lub Cheeb Koom Txoos thiab cov Txiv Plig tuaj lwm qhov tuaj coob kawg.

Sawv daws tuaj sib sau nyob hauv lub tsev teev Ntuj Son Loc, thiab sib koom ua lub thaj txi Ntuj Ntshiab.

Cov neeg ntseeg mus ua tej kab sab thiab muaj 18 tus Txiv Plig tshiab ua ntej cov neeg ntseeg, kuj muaj Tswv Qhia John Maria Vu Tat, Tswv Qhia Anthony Vu Huyen thiab Tswv Qhia Dominic Hoang Minh Tien. Nyob Nyab Laj teb muaj Tswv Ntuj lub suab hu ntau kawg, tab sis kev txais lub Cim Tiag Tes ntawm 3 tug Txiv Plig Hmoob pom tau tias yog ib qho txawv hais txog kev tshaj Ntuj Lus, thiab yog lub txiaj ntsim zoo ntawm lub Koom Txoos nyob Nyab Laj qaum teb uas muaj Hmoob xyaw.

Lub Cheeb Koom Txoos Huang Hoa muaj cov neeg ntseeg Kav Tos Liv li ntawm 200,000 leej thiab khav tas 10 lub xeev nyob Nyab Laj qaum teb. Tswv Qhia Dominic Hoang Minh Tien hais tias yog pib txij ntawm tuam ceeb Hanoi mus txog rau Sapa uas nyob npuas ciam teb Suav. Nyob hauv ntau lub xeev no, muaj cov haiv neeg tsawg uas sib txawv nyob coob. Zim txwv no ib txhia Txiv Plig hauv lub Cheeb Koom Txoos pib tshaj Ntuj lus nyob hauv cov zej zog Hmoob. Vim lawv txoj kev kub siab lug, thiaj ua rau cov Hmoob ntseeg muaj coob zuj zus tuaj, tsis hais tej txheeb ze los sis tej phooj ywg ntawm 3 tug Txiv Plig Hmoob uas nyuam qhuav tau txais lub Cim Tiag Tes no. Lawv ua lub neej pluag txom nyem nyob pem toj siab, thiab yuav tsum mus kev taw li ntawm 6 teev thiaj mus txog lub tsev teev Ntuj Son Loc, uas nyob nrug deb ntawm tuam ceeb Hanoi li 50 km.

Tswv Qhia Anthony Vu Huyen hais nyob hauv nws zaj nthuav ntawv Moo Zoo tias nws zoo siab uas yog thawj zaug pom cov Txiv Plig txais lub Cim Tiag Tes coob tshaj plaws nyob hauv lub Cheeb Koom Txoos. Thiab nws hais txog Tswv Ntuj lub suab hu uas sawv daws tau txais nyob hauv lub Cim Ntxuav.

“Txhua lub suab hu yog qhov paj tshab tuaj ntawm Tswv Ntuj tuaj.”

Thiab cov Yaj Saub lub suab hu yog ib qho nyob hauv ntau lub suab hu kom pab txhim tsa Tswv Ntuj lub Ceeb Tsheej. Qhov paj tshab pub dawb ntawm tus Tswv Ntuj nyob siab no, ua kom cov Txiv Plig sib koom ua ib lub siab nrog Yes Xus thiab pub tib txog hauj lwm rau lawv ua. Kom tau coj lub Moo Zoo mus txog cov neeg pluag cov neeg txom nyem. Cov lus kawg, Tswv Qhia tau caw kom sawv daws sib pab thov Ntuj rau lub Cheeb Koom tsev neeg. Qhov tshwj xeeb tshaj yog thov Ntuj pub cov Txiv Plig tshiab. Kom lawv txawj tso siab rau Tswv Ntuj mus li thiab txhim kho fab ntsuj plig ntawm kev koom tes, kev koom siab los ua hauj lwm rau lub Koom Txoos.

Lub Koom Txoos Kav Tos Liv nyob Nyab Laj teb muaj cov neeg ntseeg yog 6 plhom 700 tawm txhiab leej, muaj 27 lub Cheeb Koom Txoos, thiab muaj 3,073 lub tsev teev Ntuj nyob hauv txoj kev ruaj khov thiab tsis raug xwv txheej. Txhua lub tsev teev Ntuj muaj neeg nyob puv tas li. Muaj cov neeg ntseeg ruaj khov nyob hauv nyias lub tsev teev Ntuj thiab muaj kev tu lub caij qhia kev ntseeg kom haum.

Txhua qhov chaw muaj kev txhim tsa tsev teev Ntuj tshiab thiab kho cov qub, muaj cov Txiv Plig coob kawg thiab muaj kev ntseeg hauv kev teev hawm puv npo. Tab sis cov Txiv Plig ntsia pom tias lub suab hu muaj tsawg me ntsis, vim los ntawm txhua yam txheej tshiab thiab kev vam meej ntawm kev lag luam hauv lub teb chaws.