4 TUG NEEG NTSEEG TAU TXAIS VAJ QHIA LI PAJ TSHAB

Npees Las Des - Vas Tis Kas tau muab paj tshab rau 4 tug neeg ntseeg uas yog neeg Npees Las Des, vim lawv muaj feem cuam koom tes nrog txhim kho lub Koom Txoos nyob Npees Las Des teb. Yam li : yawg Tos Mas Rosario uas nws yog ib tub tseem hwv, Leej Phauj Mary Lilian thiab 2 tug xib hwb qhia ntawv Jyoti F Gomes thiab Michael Botlaru. Qhov paj tshab uas lawv 4 leeg tau txais yog “Tus Ntoo Cuam Muaj Meej Mom”. Yog lub meej mom siab tshaj ntawm cov ntoo cuam uas Vaj Qhia muab tau rau cov neeg ntseeg Kav Tos Liv nkaus xwb.

Cov kab ke pub paj tshab ntawd yog ua tau 1 lub hlis dhau los lawm, nyob hauv lub Tsev Tswv Qhia (Archbishop House) nyob tuam ceeb Thas Kas, uas yog lub caij Vaj Qhia mus tsham Npees Las Des teb. Muaj Tswv Qhia George Kocherry ua tus tos txais.

Tos Mas Rozario hnub nyoog 69 xyoos. Nws yog tus thawj tswj lub Koom Haum Union Parishad 38 xyoo. Tam sim no nws yog ib tug thawj coj uas ncaj ncees thiab muaj lub siab kub lug txhawb nqa txoj kev ntseeg thiab tej pab pawg neeg.

Leej Phauj Mary Lilian hnub nyoog 90 xyoo. Nws tau pab 4,000 tus poj niam kom lawv lub neej hloov. Nws yog tus saib lub tsev qhia tsim toob xib puaj yam, xws li hiab pob tawb, puab lauj kaub av ci, ua qhws ntsej, xaws hnab nas tawv thiab xaws khaub ncaws. Ua rau coob leej poj niam txawj tsim yam ub yam no muag los pab lawv lub neej.

Jyoti F Gomes muaj 67 xyoo. Yog tus lwm tswj cov tsev kawm ntawv Kav Tos Liv nyob Npees Las Des teb. Nws ua xib hwb qhia ntawv thiab xyaum kom lwm tus txawj qhia ntawv.