BIBI THOV KEV NCAJ NCEES RAUCOV NEEG NTSEEG RAUG CAIJ TSUJ

Asia Bibi yog ib tug poj niam neeg ntseeg uas yav tag los nws raug txiav lub txim tuag, vim nws hais lus thuam cov kev teev hawm nyob Pas Kis Taas teb, tab sis txog qhov kawg nws kuj raug tso tawm nyob ywj siab. Tam sim no nws yog lub suab ntawm tsoom neeg ntseeg nyob thoob ntiaj teb. Bibi hais txog lub rooj sab laj kev thaj yeeb hauv cov kev teev hawm txawv teb chaws, nyob hauv cov Video uas tuaj Kas Nas Das teb tuaj. Nws thov ua tsaug rau cov neeg ua hauj lwm pab kom nws tau tawm hauv nkuaj los, thiab nws ua Tswv Ntuj tsaug uas nws raug tso tawm zaum no thiab tam sim no nws nyob Kas Nas Das teb.

Bibi hais tias nws yuav ua tsoom neeg ntseeg nyob hauv nkuaj lub suab, nyob hauv lawv txoj kev txom nyem. Yam li nws yuav ua lub suab taij thov kev ncaj ncees rau cov neeg raug txim.

Xyoo 2010, Bibi raug lub txim tias nws hais lus thuam lwm txoj kev teev hawm, ces nws raug txiav lub txim tuag. Xyoo 2018, nws raug tso tawm nkuaj los thiab ua neeg thoj nam nyob Kas Nas Das teb.

Bibi piav tias : nws ua hauj lwm nyob hauv ib daim liaj, muaj neeg pom nws siv ib lub khob uas cov Mawv Xis Lim siv kam los haus dej, lawv hais tias nws yog ib tug neeg ntseeg tsis tsim nyog nws yuav siv lub khob ntawd. Ces lawv muaj lus sib cav sib ceg,  5 hnub tom qab muaj neeg mus kom Bibi rau cov thawj coj Mawv Xis Lim tias nws saib tsis taus cov Mawv Xis Lim. Tsuas muaj Bibi tsev neeg ib yig neeg ntseeg nyob rau thaj tsam ntawd xwb, ces Bibi raug quab yuam kom hloov nws txoj kev teev hawm. Bibi thiaj raug txiav lub txim tuag yog dai caj dab tuag, yog vim nws thuam cov Mawv Xis Lim. Xyoo 2014, Bibi cev tsab ntawv thov zam txim rau lub tuam tsev txiav txim, tab sis lub tuam tsev txiav txim tsis kam txo txim rau nws. Bibi tau cev tsab ntawv txo txim ntau zaus, ces xyoo 2018 nws thiaj tau tawm nkuaj. Lub 5 hlis xyoo 2019, nws thiab tsev neeg thiaj khiav mus nyob Kas Nas Das teb. Bibi hais tias thaum kuv nyob hauv nkuaj, kuv txhawj xeeb txog kuv cov me nyuam thiab kuv tsev neeg, kuv tsis paub tias lawv nyob zoo li cas, tab sis lub caij ntawd kuv kuj tso siab rau Tswv Ntuj”. “Thov ua tsaug rau sawv daws txoj kev thov Ntuj thiab yoo mov, vim sawv daws txoj kev thov Ntuj, ces kuv thiaj tau nyob twj lij”.

Thov kom peb cov neeg ntseeg sawv daws koom siab tuav tes, thiab sib koom siab ua ib lub suab rau cov neeg ntseeg uas tab tom raug kev ntxhov siab. Thov kom lawv tau dim ntawm lawv tej kev ntxhov siab, ib yam li Tswv Ntuj tau ua rau kuv.