Cov hauj lwm ntawm Maryknoll pub lub sij hawm rau cov neeg lag ntseg nyob Khas Phus Chas teb rov muaj lub neej tshiab

Txiv Plig Dittmeier kwv yees tias muaj cov neeg lag ntseg li ntawm 61,000 leej thiab cog tsis hnov lus li ntawm 600,000 leej nyob Khas Phus Chas teb.

Thaum Sambath niam thiab txiv mus ntsib cov tub ua hauj lwm hauv lub Koom Haum pab cov neeg lag ntseg nyob Phnom Penh, mas Sambath nws txaj muag thiab nws nkaum nyob ntawm niam txiv pob tw xwb. Nws tsis kam ntsia leej twg thiab nws zaum pheeb ntawm lub rooj zaum. Tam sim no Sambath muaj 17 xyoo thiab nws tau kawm ntawv tsawg heev. Nws tau kawm ib ntus luv luv nyob hauv tseem hwv lub tsev kawm ntawv, nws yog ib tug neeg lag ntseg. Nws kheev kheev raug tej phooj ywg thuam thiab saib tsis taus, ces nws txaj muag, nws tsis kam mus kawm ntawv lawm.

Nws niam thiab nws txiv xav kom nws hnov lus thiab xav pab nws ntau tshaj ntawd, ces nkawd thiaj mus nug cov tub ua hauj lwm nyob DDP txog kev pab kom Sambath hnov lus. Sambath pom cov tub ua hauj lwm piav tes ruam ua lus Khas Phus Chas rau nws. Cov tub ua hauj lwm hais tias : “Thaum Sambath pom peb piav tes, nws zaum twj ywm ntawm lub rooj, nws tsa taub hau thiab saib peb”. 

Maryknoll Lay Missioner Julie Lawler tus xib hwb qhia cov neeg lag ntseg nyob hauv lub nroog Austin, lub xeev Texas thiab nws ua hauj lwm rau DDP 3 xyoos dhau los. Nws hais tias nyob hauv DDP tsis yog tias Sambath tib leeg xwb thiaj yog neeg lag ntseg, ces nws niam nws txiv muaj kev cia siab thiab cia Sambath kawm nyob hauv DDP.

Txiv Plig Dittmeier uas nws ua hauj lwm nrog Maryknoll Lay Missioners, nws yog tus Txiv Plig tuaj ntawm lub Cheeb Koom Txoos Louisville, lub xeev Kentucky tuaj, nws ua hauj lwm pab cov neeg lag ntseg thiab tshaj Ntuj Lus nyob hauv lub tsev qhia cov neeg lag ntseg nyob Louisville, nyob Is Ntias, nyob Sri Lanka thiab nyob Hooj Koos. Xyoo 2000 nws thiaj tuaj pab cov neeg lag ntseg nyob Khas Phus Chas teb, uas yog ib tug Txiv Plig ntawm Maryknoll Fathers and Brothers.

Cov hauj lwm pab cov neeg lag ntseg Maryknoll, yog pab kom cov neeg lag ntseg nyob Khas Phus Chas teb nkag siab txog lawv tus kheej, paub piav lus ruam thiab xyaum hauj lwm.