COV KAV TOS LIV HAUV AS MES LIS KAS TEB UA HMOOV TSUJ XEEB LIS PIAM KEV YWJ PHEEJ

Cov Tswv Qhia nyob As Mes Lis Kas nqua hu kom tas cov neeg ntseeg Kav Tos Liv nyob As Mes Lis Kas teb ua hmoov tsuj xeeb thov Ntuj pub kev ywj pheej rau txoj kev ntseeg. Kev ua hmoov tsuj xeeb yog hnub tim 22 txog 29 lub 6 hli xyoo no.

Lub ntsiab lus ntawm kev ua hmoov tsuj xeeb yog “Koom ua ib tug nyob hauv kev ywj pheej”. Yog lub ntsiab lus ntawm lis piam kev teev hawm ywj pheej xyoo no.

Vim li cas thiaj xaiv hnub tim 22 lub 6 hli los ua hmoov tsuj xeeb? Kuj yog vim xav ua kev nco txog Leej Ntshiab Tos Mas Mos (St. Thomas More) thiab Zam Fis Saws (St. John Fisher) uas yog 2 tug Leej Ntshiab tuag tiv thaiv Vaj Qhia Oos Lis Yim (Pope Henry VIII) kom kev ywj pheej muaj nyob mus li, thiaj ua rau lub Koom Txoos thiab cov neeg ntseeg tau ua lub neej ywj pheej muaj kev ncaj ncees thiab ua zoo rau sawv daws.

Tim 29 lub 6 hli, kuj yog ua hmoov tsuj xeeb Leej Ntshiab Pob Zeb thiab Paj Lug nyob Los Mas thiab.

Nyob hauv tsab ntawv tshaj tawm, mas Tswv Qhia sau tias “Kev sib koom ua ib lub siab, muaj txiaj ntsim qab hau dua kev tawm tswv yim, qhov no yog hais txog kev xav thiab nqis tes ua”.

Kev ywj pheej nyob hauv kev teev hawm yuav tsum muaj ntxiv mus, ua kom cov neeg ntseeg txawj ua lub neej coj tus yam ntxwv zoo thiab lub siab zoo rau sawv daws. Cov hauj lwm no USCCB tau npaj siab txhawb nqa txog kev thov Ntuj, thiab lub ntsiab lus hauv kev thov Ntuj txhua hnub hauv lub lis piam.

USCCB npaj txhij yuav pab txhawb nqa kom neeg to taub txog kev ywj pheej ntawm kev ntseeg Kav Tos Liv, thov Ntuj kom muaj lub hom phiaj, thiab ua cov hauj lwm txhawb nqa kev ywj pheej hauv kev teev hawm.