COV KAV TOS LIV NYOB NYAB LAJ TEB PAB COV NEEG TXOM NYEM

Lub caij noj tsiab xyoo no cov neeg Nyab Laj uas yog cov ntseeg Kav Tos Liv tau coj txhiam xws noj mus faib rau tsoom pej xeem pluag txom nyem.

Hnub tim 6 lub 2 hlis no thaum sawv ntxov, Txiv Plig Yos Xes Fambalam uas nyob hauv lub zos Hoa Hung tau foom hmoov zoo rau cov txhiam xws noj 300 pob nyob hauv tsev teev Ntuj. Ua ntej cov tub koom tes Caritas yuav coj mus faib rau cov neeg txom nyem nyob hauv lub nroog Hom Cis Mees.

Mab Liab Oanh uas yog tus thawj coj ntawm cov Caritas nyob hauv lub zos hais tias : tej pob txhiam xws noj uas peb tau npaj, yog ua paj tshab me me pub rau cov neeg pluag txom nyem. Yog ib qho ua piv txwv tias peb faib kev sib nyiam sib hlub rau sawv daws nyob hauv lub caij noj tsiab, ces vam tias lub caij noj tsiab xyoo no sawv daws yuav muaj txhiam xws txaus noj.

Qanh uas nws muaj hnub nyoog 65 xyoos hais tias ; cov txhiam xws noj uas lawv coj mus faib rau cov neeg pluag txom nyem, mas yog tau los ntawm cov neeg siab zoo pab thiab yog peev nyiaj txiag ntawm Caritas.

Thach Tam uas nws yog ib tug neeg Khas Phus Chas nyob ze ntawm lub tsev teev Ntuj. Nws hais tias nws zoo siab heev, vim nws tau txais txhiam xws noj nyob hauv lub caij noj tsiab los ntawm cov neeg ntseeg Kav Tos Liv pub rau nws. Nws yog ib tug nyob hauv pab 150 leej uas txhua lub hlis yuav tsum tau txais txhiam xws noj thiab txhuv 10 kg nyob hauv lub zos. Leej Phauj Trinh uas nws yog tus thawj tswj saib lub tsev kawm ntawv Ai Linh Love hais tias : nws tau muab me ntsis nyiaj ntim rau 420 lub hnab ntawv thiab faib rau cov me nyuam kawm ntawv uas lawv txom nyem thiab cov yim neeg pluag nyob ib ncig ntawm lub tsev kawm ntawv.

Txiv Plig Yos Xes Nguyen Hutriet uas nws yog tus thawj coj nyob hauv lub zos Xas Tsaus kuj muab cov nyiaj nws tau los yuav nqaij yuav txhuv thiab lwm yam faib rau cov neeg pluag 250 leej. Hanh hais tias cov neeg nyob hauv nws lub zos tau sib pab muab tej toob xib uas siv lawm sau coj mus muag, kom tau nyiaj los yuav txhiam xws noj faib rau cov tub zog txawv teb chaws thiab cov tau txais kev kub ntxhov los ntawm tus kab mob Covid-19. Tas txhua yam no yog cov neeg ntseeg Kav Tos Liv pab cov neeg pluag nyob hauv lub caij noj tsiab xyoo no.