COV LEEJ CHOJ NYOB AS XIAS THIAB AS FIV KAS MUAJ COOB TUAJ NYOB HAUV 5 XYOOS TAS LOS

Nyob hauv 5 xyoos dhau los no, nyob As Xias teb thiab nyob As Fiv Kas teb muaj cov tub tshaj Ntuj Lus coob tuaj, yam li cov Txiv Plig, cov Leej Phauj, cov Leej Tsob Hwb thiab cov Leej Tij. Tab sis hais txog cov tub tshaj Ntuj Lus nyob thoob ntiaj teb, mas tsawg dua qub lawm. Raws li lub Koom Txoos tsab ntawv xov xwm Annuarium Statisticum Ecclesiae tshaj tawm.

Lub rooj pwm tsav lis dej num hauv lub Koom Txoos tau soj ntsuam txog cov tub tshaj Ntuj Lus nyob thoob ntiaj teb txij xyoo 2013 txog 2018, mas pom tias cov tub tshaj Ntuj Lus nyob thoob ntiaj teb tsawg dua qub lawm 3 feem pua. Tas cov tub tshaj Ntuj Lus nyob thoob ntiaj teb tam sim no tshuav 414,000 leej. Nyob hauv cov tub tshaj Ntuj Lus no, muaj 43,000 leej yog cov Txiv Plig thiab cov Leej Phauj tshiab. Nyob hauv 43,000 tus Txiv Plig thiab Leej Phauj no, cov coob yog nyob As Xias teb thiab nyob As Fiv Kas teb sib npaug zos.  

Raws kev tshaj tawm ntawm Annuarium Statisticum Ecclesiae nyob hauv xyoo 2018, thiaj pom tias cov tub tshaj Ntuj Lus nyob thoob ntiaj teb muaj tsawg dua qub lawm, tab sib yog hais txog As Xias teb thiab As Fiv Kas teb, mas muaj coob dua qub. Ua ntej hauv xyoo 2013, cov tub tshaj Ntuj Lus nyob thoob ntiaj teb muaj 415,348 leej. Tab sis txog xyoo 2018, mas cov tub tshaj Ntuj Lus muaj 414,065 leeg, ces txhais tau tias tsawg dua qub lawm. Tab sis cov tub tshaj Ntuj Lus nyob As Xias teb thiab As Fiv Kas teb muaj coob tuaj li 14 feem pua thiab 11 feem pua. Xyoo 2018, muaj cov tub tshaj Ntuj Lus tshiab ntxiv li ntawm 2,200 leej.

Nyob As Mes Lis Kas teb, muaj cov Txiv Plig thiab cov Leej Phauj li ntawm 122,000 leej. Nyob hauv xeev ntuj Aws Los Pas thiab Os Xes As Nias, mas cov tub tshaj Ntuj lus muaj tsawg dua qub li ntawm 7 feem pua. Cov tub tshaj Ntuj Lus nyob As Mes Lis Kas teb tsawg dua qub 6 feem pua, Aws Los Pas tuam teb tsawg dua qub 8 feem pua thiab Os Xes As Nias tuam teb tsawg dua qub 3 feem pua. Cov tub tshaj Ntuj Lus nyob As teb coob dua qub 12 feem pua, As Fiv Kas 9 feem pua.