Cov Leej Phauj Kav Tos Liv pab 2 tug ntxhais Is Ntias uas nkawd yuav txiv thaum hnub nyoog tseem yau

Kavitha muaj 14 xyoos thiab Navyashree hnub nyoog 16 xyoo nkawd yuav txiv, tab sis nkawd nyob ua ke tsis ntev ces nkawd yawm txiv ntiab 2 tug ntxhais tawm hauv lawv lub zos uas nyob hauv lub xeev Andhra Pradesh, nyob Is Ntias toob fab naj. 

Hnub no nkawd 2 leeg nyob hauv peb txoj kev saib xyuas thiab tau xyaum kom nkawd txawj ua kws kho mob nyob hauv tsev. Leej Phauj Ignatius Suman uas yog tus thawj tswj lub tsev kawm Sree Jeevan Jyothi, hauv lub nroog Polur thaj tsam Nandyal hais cov lus no.

2 tug ntxhais no yog ib feem nyob hauv 150 tus me nyuam kawm ntawv, yog cov lub neej piam sij sib yuav thaum tseem yau. Nkawd raug xyaum kom txawj ua kws kho mob saib xyuas cov neeg laus, cov poj niam cev xeeb tub, cov tuag tes tuag taw nyob hauv tsev thiab nyob hauv tsev kho mob. Tam sim no Kavitha muaj 18 xyoo lawm, nws hais rau Global Sisters Report (GSR) tias : nws txoj kev npau suav puas tag rau thaum nws tseem yau, thaum uas nws niam thiab nws txiv yuam kom nws yuav ib tug txiv neej uas tsis tau sib paub dua, vim qhov ntawd tsis haum rau nws txoj kev cia siab. Tom qab nws kawm tiav qib 8 tsis ntev, nws raug quab yuam ua tas ib puas tsav yam hauj lwm hauv nws tus txiv lub tsev. Yam uas lawv xav tau tsuas yog ib tug ntxhais qhev xwb. Nws hais tias : nws tus txiv thiab nws niam nws txiv lawv kheev kheev ntaus nws, vim nws nkees ua hauj lwm. Cov Leej Phauj qhib lub tsev kawm nyob hauv lub nroog Polur, lawv pib ua cov hauj lwm no tau 113 xyoos lawm. 13 xyoos tag los, lawv lub tsev kawm tau qhia 650 tus ntxhais hluas kom lawv txawj ua tus pab kws kho mob, txawj nrhiav hauj lwm ua nyob hauv tej tsev kho mob, ua hauj lwm hauv vaj hauv tsev thiab ua kws kho mob nyob hauv tsev.