Cov Leej Phauj nyob Mias Mas piav txog lawv tej kev mob siab

Cov neeg ntseeg thiab cov Leej Phauj nyob Mias Mas sib sau piav txog lawv tej kev nyuab siab uas lawv tau pom thiab tau ntsib nyob hauv 2-3 lub hlis tag los.

“Xov xwm phem tuaj txog peb txhua hnub, muaj neeg raug ntes, raug ntaus, raug mos deev thiab raug tua. Hlawv tsev, lawv tej tsev teev Ntuj, lawv tej chaw ntshiab, lawv zej hlawv zos. Hoob pob tawg, cov neeg khiav ua sab ua sua muaj coob zuj zus. Muaj kev sib caum sib tua, ntes neeg, tua neeg ua dog dig.

Niam Beatrice uas yog ib tug nyob hauv 380 leej ntsib kev nyuab siab hais tias : tam sim no muaj neeg khiav mus nyob hauv 13 lub tsev teev Ntuj nyob hauv 16 lub Cheeb KoomTxoos nyob Mias Mas.

Lub Koom Haum neeg ntseeg Kav Tos Liv txhim tsa nyob hauv lub nroog Milan xyoo 1859, cov neeg ntseeg tau sib faib nrog tsoom pej xeem Mias Mas hais txog kev txeeb teb chaws hnub tim 1 lub 2 hlis xyoo no. 

Muaj ib tug neeg ntseeg hais tias : “Peb nkaum nyob hauv hav zoov los tau 1 lub hlis ntau lawm, txhiam xws noj tab tom yuav tag”. Tseem muaj ib tug poj niam hais tias : “Kuv tsev neeg kuj khiav mus nkaum hav zoov hav tsuag, peb kheev kheev hnov suab hoob pob tawg thiab muaj ib hmos peb hnov cov tub rog sib tham ze peb, peb ntshai raug ntes kawg”.

Tsis tas li ntawd, cov Txiv Plig thiab cov neeg ntseeg kuj raug kaw thiab raug tua tuag, tej tsev teev Ntuj raug tsoo raug hlawv tas.

Muaj ib tug Leej Phauj hais tias : “Ua ntej cov xwm no yuav tshwm sim, kuv niam thiab kuv txiv niaj tag kis txais lub Cim Yug thiab tau nrog Txiv Plig sib tham hais txog kev ua lub Cim Cog Lus txwm 50 xyoo”. Tom qab ntawd kev kub ntxhov kuj tshwm sim, ces lawv khiav mus nkaum hav zoov hav tsuag tas. Lawv nrhiav chaw tshiab nkaum tas mus li, lawv khiav hoob pob thiab muab tej me nyuam zais hauv tej hauv paus ntoo.