Cov neeg sawv cev ntawm cov Tswv Qhia Is Ntias thov kev ywj pheej nyob hauv lub xeev Manipur

Tswv Qhia Thazhath uas nws yog ib tug nyob hauv 3 tug tim xyoob CBCI hais tias : cov xwm txheej nyob hauv lub xeev Manipur, ua rau txom nyem siab ntsws kawg. Cov sawv cev ntawm lub rooj sab laj Tswv Qhia nyob Is Ntias CBCI, tau thov kom muaj kev ywj pheej thiab muaj kev sib tham tom qab lawv mus tsham lub xeev Manipur, uas yog lub xeev tau txais kev kub ntxhov 2 hnub nyob hauv kev teev hawm. 

“Peb thov kom tas cov neeg muaj feem cuam txog, mus sib koom nyob hauv kev sib tham thiab siv tej yam tseem ceeb los txhim kho sawv daws, kom muaj kev ywj pheej thiab kev sib haum xeeb nyob Is Ntias teb. Qhov tshwj xeeb tshaj mas yog lub xeev Manipur.” CBCI hais cov lus no hnub tim 24 lub 7 hli tag los.

Cov sawv cev tau mus tsham xyuas cov thaj tsam uas raug kev kub ntxhov, xws li vaj tse, tsev teev Ntuj, tsev kawm ntawv thiab lwm yam, mas raug hlawv, raug tsoo piam sij thiab muaj neeg tuag 150 leej. Tseem muaj ntau caum txhiab leej tshais chaw thiab, yog pib txij hnub tim 3 lub 5 hlis uas cov xeev nyob sab toob fab pej hauv Is Ntias teb raug kev kub ntxhov los. 

“Nws yog ib qho mob siab uas ntsia pom tias tej chaw no npob xuav thiab zoo li lawv tsis muaj chaw nyob rau yav tom ntej, vim tsis muaj chaw cia siab thiab kev ntshai tseem muaj tsis tseg.” Kev mus tsham zaum no, yog tom qab 3 hnub uas muaj ib qho Video tso tawm hnub tim 19 lub 7 hli tag los, muaj 2 tug poj niam neeg ntseeg raug quab yuam hle liab qab taug kev. 2 tug poj niam ntawd, muaj ib tug hnub nyoog 21 xyoos, nws tseem raug mos deev thiab nws txiv, nws tus nus hlob raug tua tuag.

Cov xwm tshwm sim yog hnub tim 4 lub 5 hlis tag los, lub caij ntawd kuj muaj cov tub ceev xwm nyob ntawd thiab, tab sis cov tub ceev xwm tsis tau ua dab tsi los pab. Vim li ntawd tus thawj pwm tsav Modi cov nom thiaj raug liam txim tias lawv yog cov koom siab nrog txoj kev ua phem ntawd.

Yog thawj zaug ua tus thawj pwm tsav Modi tsis txaus siab rau qhov Video tso tawm ntawd, thiab nws hais tias : “Txaj muag kawg.”

Cov sawv cev hais tias : “Peb ntxhov siab heev, hais txog kev nyob ntsiag to yam tsis paub kub ntxhov los tau ntev thiab tsis quav ntsej txog cov nom uas saib xyuas txoj cai, lawv tsis ti thaiv kev kub ntxhov.” 

Cov sawv cev faib txhiaj laj txhiam xws noj thiab qhib tej lub tsev tshuaj, yog Caritas India cev tes pab kev kub ntxhov uas tsis tau tshwm sim los dua li. Thiab lawv tau koom tes nrog lub Koom Haum pab neeg Kav Tos Liv thiab Diosesan Social SerVices Society uas yog lub Koom Haum pej xeem ntawm lub Cheeb Koom Txoos Imphal.

Vaj Qhia lub Koom Haum pab neeg kuj tau pab nyiaj 30 plhom Rupee, los yog 366, 742 dos las rau cov pej xeem raug kev kub ntxhov ntawd thiab.

Add new comment

4 + 5 =