COV NTSEEG KAV TOS LIV HAUV ZOS NAB NYAS, LOS TSUAS TEB UA KAB KE NQAUM NPLOOJ

Hnub chiv tim 5 lub 4 hli 2020 no yog ‘Hnub Chiv Nqaum Nplooj’ raws li Kav Tos Liv cov kab ke. Yog hnub cov ntseeg txog Huab Tais Yes Xus yuav sib sau ua kab ke nqaum nplooj nyob hauv cov tsev teev Ntuj, kom nco txog thaum Huab Tais Yes Xus los hauv nroog Yes Lus Xas Les zoo li ib tug pleev.
Nyob rau sab Los Tsuas teb mas nom tswv tsab cai teev hawm Yes Xus nruj heev, cov Leej Choj los muaj tsawg thiab pem zos Hmoob mas tsis muaj tsev teev Ntuj, yog li cov ntseeg thiaj niaj lis piam sib sau ua Thaj Txi Ntuj nyob hauv tus coj lub tsev ntau xwb.
Hauv lub zos Nab Nyas mas muaj Xib Hwb Xaiv Qiam yog tus saib xyuas cov ntseeg sawv daws, yog li nyob rau Hnub Chiv Nqaum Nplooj nws thiaj sawv ua tus coj sawv daws ua kab ke nqaum nplooj.
Txawm tias tsis muaj ib tus Leej Choj tuaj saib xyuas thiab tuaj ua kab ke rau lawv los, lawv tseem muaj lub siab kub lug thiab ruaj nreb rau txoj kev ntseeg uas thaum ub cov Txiv Plig Fab Kis tau cog nyob hauv lawv thiab lawv tseem niaj hnub ua tim khawv txog Huab Tais Yes Xus lub Moo Zoo nyob hauv lawv lub neej.
Tus sau : Muas Lauj, Zoo Tswv Zov Yaj