COV NTSEEG NYOB LOS TSUAS TEB

Zim txwv no cov haiv neeg tsawg uas ntseeg Ntuj nyob Los Tsuas teb tseem raug cov tseem hwv txwv nruj kawg nyob hauv cov thaj tsam uas deb tuam ceeb Vees Cas. Tab txawm cov tseem hwv Los Tsuas tau hais tias lawv hloov txoj cai yuav txuag kev ywj pheej ntawm cov kev teev hawm, tsis kav txoj kev ntseeg nyob nroog Louang Phabang kuj tseem raug txwv nruj. Nyob Louang Phabang muaj 3 txoj kev teev hawm uas cov tseem hwv Los Tsuas tau hais tias lawv lees paub thiab tso cai xoob, yog cov Kav Tos Liv, cov Adventist uas yog lawv teev Ntuj hnub xya, thiab cov tsev teev Ntuj Los Tsuas uas yog cov Evangelical. Los Tsuas teb hwm txoj kev teev hawm Phus Thas yog thawj txoj cai kav lawv lub teb chaws. Dhau ntawm txoj kev teev hawm Phus Thas lawm, mas lawv pom tias lwm txoj kev teev hawm yog ua teeb meem rau cov tseem hwv txoj kev tswj hwm xwb. Vim li no thiaj kheev kheev muaj teeb meem rau cov Hmoob ntseeg Ntuj nyob Los Tsuas teb uas lawv yog neeg toj siab. 
Ntawm no mus yog cov lus tshaj tawm los ntawm lub xov tooj cua Radio Free Asia. Nyob hauv lub xeev Louang Phabang zim txwv no txoj kev ntseeg tseem raug txwv nruj kawg. Cov tseem hwv hais tias hauv cov zej zog tsis muaj ib tug tswv ntawm txoj kev ntseeg thiab cov kev cai raws poj yawm txwv koob, mas puav leej yog dab xwb. Tus twg ntseeg txoj kev ntseeg ntawm cov neeg As Mes Lis Kas, mas tsim nyog nws yuav nco tias cov neeg As Mes Lis Kas tau ua dab tsi rau lawv lub teb chaws. Ntsuj tsov rog Nyab Laj uas cov tub rog As Mes Lis Kas siv dav hlau tso hoob pob ntau caum txhiab lub nyob Los Tsuas teb, yog lub qhov txhab cim tseg txog tav no. Vim li ntawd cov pej xeem uas yog neeg ntseeg thiaj tsis tau txais kev pab los ntawm tseem hwv. Lawv hais tias cov neeg ntseeg tsis muaj cai dab tsi thiab yuav tsis muaj neeg quav ntsej txog. Tab sis cov neeg Los Tsuas uas yog neeg ntseeg, mas tseem hwv saib xyuas lawv raws txoj cai ywj pheej ntawm kev teev hawm. Hos cov Hmoob ntseeg, mas tseem hwv tsis lees txog lawv. Ceev faj tsam raug ntes yog leej twg txais lub Cim Ntxuav los yog Cim Raus Dej. Cov tseem hwv nyob hauv lub xeev Huam Phas (Houa Phan) hais tias : nyob hauv lub xeev Huam Phas cov tseem hwv tsis tau hiam ib tug neeg ntseeg twg, tab sis cov neeg ntseeg raug qhuab qhia thiab raug ntes, yog vim lawv tsis ua raws tseem hwv txoj cai. Tseem hwv txoj cai yog txwv tsis pub txw lwm tus kom los txais kev ntseeg. Ntau xyoo dhau los no, cov neeg ntseeg uas raug ntes kaw nyob Los Tsuas teb, muaj tsawg zuj zus lawm. Xyoo 2019 tsaib no, tsis muaj xov xwm hais txog ib tug neeg ntseeg twg raug ntes nyob Los Tsuas teb. Tab sis cov Hmoob ntseeg kuj tseem yog qhov chaw ua xyem xyav ntawm cov tseem hwv thiab muaj 3 yim neeg ntseeg nyob hauv lub xeev Louang Namtha raug ntiab tawm hauv lawv lub zos mus lawm, vim lawv tsis kam tso lawv txoj kev ntseeg pov tseg. 
Hnub tim 15 lub 3 hlis 2020 no, muaj ib tug neeg Los Tsuas raug ntes nyob hauv ib lub zos me me nyob Savannakhet. Vim tus neeg ntseeg Los Tsuas ntawd ua cov kab ke teev Ntuj, ces nws raug txiav txim kaw nkuaj 6 lub hlis. Feem ntau cov neeg ntseeg uas raug ntes nyob Los Tsuas teb, mas yog cov Plos Tes Taas. 
Vam txog : https://unpo.org/
Tus txhais : Lis Maib, Zoo Tswv Zov Yaj