COV NTSEEG SIB KOOM SIAB UA THAJ TXI NTUJ

Lub tsev teev Ntuj hwm niam Mab Liab nyob Kuas Das Lus Pes hauv zos Hooj Kav txhim tsa xyoo 2004, muaj Txiv Plig Udomsak Vongvuthiphong ua tus saib xyuas. thaum ntawd muaj cov kwv tij Hmoob hloov siab los ntseeg thiab txais Cim Ntxuav li 109 leeg thiab cov npaj siab tos txais Cim Ntxuav 58 leeg.
Tom qab xyoo 2009 lub Cheeb Koom Txoos Nakornsavan muab cov tsev teev Ntuj hauv zos Hmoob tso rau lub koom haum OMI saib xyuas, mas koom haum OMI thiab xa Txiv Plig Txawj Zam (Fr. Varanyu Sikhon) tuaj saib xyuas txog rau xyoo 2015 thiaj hloov rau Txiv Plig Txawj Foom (Fr. Thossaporn Narinrak).
Vim cov Leej Choj hauv lub koom haum OMI li hauj lwm ntau ces tom qab ntawd Txiv Plig Txawj Foom tsis muaj sij hawm tuaj ua thaj txi Ntuj thiab qhia sawv daws, yog li ziag no nyob hauv zos Hooj Kav thiaj tshuav 3 yig lawm xwb.

Thawj zaug uas Txiv Plig Vam Tuam tua ua thaj txi Ntuj rau cov kwv tij ntseeg hauv zos Hooj Kav no yog hnub tim 9 lub 11 hlis, zaum no yog zaum ob. Txiv Plig Vam Tuaj thiaj caw Txiv Plig Kovit coj cov ntseeg hauv zos Nav Xais tuaj koom nrog nws thiab cov ntseeg hauv zos Fib Xaim tuaj koom siab ua ke.
Txiv Plig Vam Tuaj vam tias yav no lawm tom ntej cov ntseeg sawv daws yuav rov qab kub siab thiab rau siab tuaj teev Ntuj, yog muaj ib tus Leej Choj los yog cov kwv tij ntseeg mus pab lawv teev Ntuj thiab coj lawv.