COV OBLATES SAIB COV NEEG TSIS MUAJ VAJ TSE NYOB NYOB HOOJ KOOS

Sij hawm dhau los lawm yuav luag 10 xyoo, uas ib tug txiv neej hu ua As Meem pw nyob ntawm tej tshav puam hauv lub tshav dav hlau Hooj Koos. Tsaib no cov tub ceev xwm txwv thiab tshuaj xwm nruj nruj txog cov neeg nkag thiab tawm mus los hauv tshav dav hlau. Lawv tsuas kheev cov neeg ua hauj lwm hauv tshav dav hlau thiab cov neeg caij dav hlau thiaj nkag mus tau xwb. Ces As Meem khiav mus pw nyob hauv ib lub tsev muag zaub mov noj Mev Dav Naum (McDonald’s). Nws pw nyob ntawd tas hnub tas hmo, tsis hais nruab hnub los yog hmo ntuj. 
As Meem hnub nyoog muaj 75 xyoos lawm. Tom qab ntawd tsis ntev ces muaj tus kab mob Covid-19 tshwm sim, nws raug tus tswv tsev ntiab tawm mus pw ntawm ntug kev. Vim tseem hwv Hooj Koos txwv tsis pub McDonalds thiab lwm cov khw muag txhiam xws noj rau yav hmo ntuj lawm. Hmoov zoo, ces As Meem tau ntsib ib tug Txiv Plig yog cov Oblates hu ua Zam Wotherspoon. Vim Txiv Plig Zam Wotherspoon niaj hnub taug kev ncig nyob ntawm thaj tsam Yau Ma Tei txhua hnub, kom tau pab cov neeg tsis muaj vaj tse nyob. Yav tag los Hooj Koos yog zwm rau Aas Kiv teb, pom tias xyoo 2013 muaj cov neeg tsis muaj vaj tse nyob pw ntawm tej ntug kev 1,500 leej. Tab sis tam sim no Txiv Plig Zam Wotherspoon xav tias cov neeg pw nyob ntawm tej ntug kev yuav muaj coob tshaj xyoo 2013 ob npaug. Cov tsev ntiav pw nyob Hooj Koos zim txwv no kuj kim tshaj plaws nyob hauv ntiaj teb no thiab. Yog vim vaj tse kim, ces thiaj ua rau cov neeg tsis muaj vaj tse nyob coob zuj zus tuaj. 
Txiv Plig Wotherspoon hais tias : cov neeg tsis muaj vaj tse nyob thiab lawv nyob pw ntawm tej ntug kev feem coob, yog cov neeg laus uas tsis muaj hauj lwm ua thiab lawv ua tsis tau hauj lwm lawm. Tsis tas li ntawd, lawv kuj yog ib co neeg tsis zoo tes tsis zoo taw thiab muaj teeb meem txog lawv lub cev. 
Tej tus neeg laus uas lawv hnub nyoog 60 xyoo rov saud, mas lawv tau txais nyiaj laus ntawm tseem hwv Hooj Koos 440 US dos las nyob hauv ib lub hlis. Tam sim no As Meem thiab 2 tug neeg laus sib koom pw nyob hauv kem tsev uas Txiv Plig Wotherspoon pub rau lawv nyob. Txij thaum tus kab mob Covid-19 sib kis los, mas cov Txiv Plig thiab cov Leej Phauj qhib ib txoj kev nrhiav nyiaj los pab cov neeg tsis muaj vaj tse nyob, kom lawv muaj lub chaw nyob chaw pw. 
Txoj kev qhib nrhiav nyiaj ntawd, yog tos txais cov nyiaj uas tsoom pej xeem pub. Tam sim no pob nyiaj ntawd tau li ntawm 155,000 US dos las lawm. Feem ntau kuj yog los ntawm cov Txiv Plig, cov Leej Phauj thiab tsoom neeg ntseeg Kav Tos Liv nyob Hooj Koos. Cov nyiaj no txaus pab ntiav cov tsev pheej pheej yig rau 40 tawm tus neeg nyob thiab ua ib lub khw muag toob xib puaj yam pheej pheej yig rau cov neeg ntawd tau siv. Txiv Plig Wotherspoon hais ntxiv tias : cov neeg pw nyob ntawm ntug kev, tej tus lawv muaj vaj muaj tsev zoo. Tab sis lawv yeem muab lawv tej vaj tse ntiav rau lwm tus nyob es cia lawv pw ntawm ntug kev kom tau nyiaj, vim kev nrhiav nyiaj nyuab heev. Txiv Plig Wotherspoon hais tias lub khw ntawd yog ib lub khw muag tej toob xib qub qub uas yog los ntawm cov nyiaj luag pub. Temple Street yog qhov chaw uas cov neeg tsis muaj vaj tse nyob coob tshaj plaws. Li ntawd, Txiv Plig thiaj tis npe rau lub khw ntawd hu ua “MercyHK 2nd Hand Eco Shop”.