COV TUB NTXHAIS HLUAS TXOJ KAB XWM HAUV CHEEB KOOM TXOOS NAKHONSAVANH, THAIB TEB

Tim 13 lub 3 hlis 2021, cov tub ntxhais hluas sib koom ua cov hauj lwm nyob hauv lub Cheeb Koom Txoos Nakhonsavanh, yam li pib txoj kev ua lub neej lawv ntoo cuam qab txij ntawm lub pov txwv Nyab Laj mus txog rau lub tsev teev Ntuj hwm Leej Ntshias As Nas nyob hauv lub xeev Nakhonsavanh.

Xyoo 2021 no, lub rooj Tswv Qhia nyob Thaib teb tau muab los ua xyoo ntawm cov tub ntxhais hluas Kav Tos Liv thiab txhib kom txhua lub Cheeb Koom Txoos ua cov hauj lwm raws Yes Xus txoj kev hlub neeg. Kom cov tub ntxhais hluas tau nco txog qhov tseem ceeb ntawm lawv lub neej thiab sib tuav tes nrog lawv cov phooj ywg mus ua ke, xws li Yes Xus tus Ntoo Cuam tau nrog nraim lawv nyob ntawm ib sab.

Lub 3 hlis xyoo 2021, yog lub hlis ntawm cov tub ntxhais hluas hauv lub Cheeb Koom Txoos Nakhonsavanh tau txais tus Ntoo Cuam uas yuav xa mus txhua lub Cheeb Koom Txoos. Yog lub Cheeb Koom Txoos twg tau txais tus Ntoo Cuam ntawd, mas yuav tsum tau ua cov hauj lwm li no :

(1) Ua kom cov tub ntxhais hluas tau kawm tau paub txog kev ntseeg nyob hauv lub Cheeb Koom Txoos Nakhonsavanh. Kom lawv rov nco txog lawv tus kheej tej txhaum thiab ua tsaug rau tsoom tub tshaj Ntuj Lus thiab tsoom poj yawm txwv koob neeg ntseeg pib ntawm lub pov txwv Nyab Laj los.

(2) Kom cov tub ntxhais hluas paub txog lawv lub luag hauj lwm nyob hauv tej pab neeg coob coob, uas yog qho chaw lawv loj hlob thiab lawv txawj ua lub neej nrog ib zeej tsoom neeg lawm yav tom ntej.

(3) Kom cov tub ntxhais hluas nco tias lawv muaj Yes Xus nyob ntawm lawv ib sab thiab nrog lawv mus kev, zoo yam li tus Ntoo Cuam nrog nraim lawv.

(4) Kom cov tub ntxhais hluas pom txog qhov muaj nqis ntawm kev teev hawm, ntawm tej kab lis kev cai ntau dua kev mus haus yeeb haus tshuaj thiab siv lub sij hawm ua ntej yam tseem ceeb muaj nqis.