Cov tub ntxhais hluas uas yog neeg Kav Tos Liv Nyab Laj raug txhib kom tawm mus

Cov tub ntxhais hluas Kav Tos Liv nyob Nyab Laj qaum teb raug hu kom tawm mus ua lub neej nyob thiab qhia kev ntseeg raws li Nyab Laj tej kab lis kev cai. Cov tub ntxhais li ntawm 15,000 leej tuaj ntawm 11 lub Cheeb Koom Txoos tuaj mus koom kev sib sau ntawm cov tub ntxhais hluas zaum tim 18, uas yog lub Cheeb Koom Txoos Hung Hoa ua tus npaj nyob hauv lub tsev teev hawm Hung, hauv lub xeev Fus Thaus hnub tim 25 thiab 26 lub 11 hlis tag los. Muaj cov tub ntxhais hluas tuaj ntawm 5 lub Cheeb Koom Txoos nyob qab teb tuaj koom thiab.

Tswv Qhia Vu Van Thien uas nyob Hanoi hais tias kev rov tuaj sib sau nyob hauv qhov qub chaw uas yog lub tsev teev hawm Hung Kings, mas lawv txoj hauj lwm yog qhia ua lub neej thiab qhia kev ntseeg Kav Tos Liv, thiab cia siab ruaj nreb rau lub teb chaws. Tswv Qhia Thien hais ntxiv tias kev tshaj lub Moo Zoo tsis yog txais cov neeg ntseeg tshiab xwb, yog yuav qhia kom neeg pom txog qhov zoo, qhov muaj txoj sia thiab kev lom zem nyob hauv lub Koom Txoos. Ua kom lwm tus nyiam txog lub Koom Txoos cov lus qhia.

Tus pab Tswv Qhia hais tias Hung Hoa yog lub Cheeb Koom Txoos uas loj tshaj plaws nyob hauv lub teb chaws hais txog qhov dav, thiab xav tshaj lub Moo Zoo kom nthuav dav. Vim li ntawd, cov tub ntxhais hluas tsim nyog yuav tau mus ntsib lwm cov tim xyoob ntawm lwm txoj kev teev hawm, thiab piav txog Yes Xus cov hauj lwm rau lawv mloog. Lub Cheeb Koom Txoos uas kav tas 9 lub xeev thiab ib nrab yog Hanoi, qhia kev ntseeg rau cov haiv neeg tsawg 31 pawg.