Cov Txiv Plig Thaib thov kev pab rau cov neeg thoj nam Myanmar

Cov Txiv Plig Thaib thov kom cov neeg ntseeg tos txais thiab muab kev pab rau cov neeg thoj nam Myanmar uas lub lis piam tag los lawv tau khiav nkag Thaib teb, vim muaj kev sib ntaus sib tua nyob Mias Mas teb. 

Cov neeg thoj nam Myanmar muaj tshaj 4,000 leej tau khiav nkag Thaib teb thiab thov lus kheev rau lawv nyob Thaib teb, feem coob lawv yog cov Kav Tos Liv. Tswv Qhia Veera uas yog tus saib lub Cheeb Koom Txoos Chiangmai yog tus hais cov lus no.

Cov neeg Myanmar uas khiav nkag Thaib teb, lawv tau txais kev pab ntawm tus thawj tswj lub xeev Mae Hong Son thiab txhua fab tub tseem hwv nrog rau tsoom pej xeem Thaib. Tus thawj tswj xeev hais tias : Thaib teb tseem yog qhov chaw nruab nrab ntawm kev sib txeeb sib tawg, tab sis kev pab no yog cov tseem hwv thiab fab saib xyuas kev ruaj ntseg pab raws li kev tib neeg kev ncaj ncees rau cov neeg thoj nam xwb. 

Kev thov txhiam xws noj thiab chaw so ntawm lub Cheeb Koom Txoos tau mus txog tus thawj tswj lub xeev Mae Hong Son thiab tus thawj tswj xeev kuj lees tias yuav pab cov neeg thoj nam, vim lub Cheeb Koom Txoos Chiangmai kav tas 4 lub xeev nyob Thaib qaum teb thiab lub xeev Mae Hong Son huv si. 

Muaj ze 4,000 tus neeg ntseeg thiab cov Phus Thas li ntawm 1,400 leej tau khiav tawm ntawm lub Cheeb Koom Txoos Loikaw uas nyob Myanmar teb mus rau Thaib teb.

Tam sim no tseem xav tau txhiam xws noj thiab tsev ntaub, tsev dej los siv. Peb tau thov kom muaj kev tos txais thiab ua kom lawv muaj kev sov siab ib yam li lawv nyob hauv lawv tsev. Tswv Qhia hais cov lus no tos txais nyob hauv Serra International uas yog lub sam thiaj ntawm cov neeg ntseeg thiab cov sawv cev li 20,000 tuaj ntawm 44 lub teb chaws.

Lub Koom Haum poj niam Karenni (KNOW), uas nyob hauv Thaib teb sab toob fab pej hais tias : cov neeg thoj nam feem coob yog cov neeg laus, cov poj niam xeeb tub thiab cov me nyuam yaus. Lawv xav tau txhiam xws noj, xav tau chaw so thiab tej yam cheem tsum siv kom sai.