HMOOB KAV TOS LIV KEV SIB TW LOM ZEM (HMONG CATHOLIC GAMES 2020)

Nyob hauv hnub tim 8 thiab 9 lub 2 hlis tas los no, pawg ntseeg Ntuj hauv Cheeb Koom Txoos Tseej Maim, Thaib teb tau sib sau koom kev sib tw lom zem nyob hauv lub zos Maetala, Wiangpapao, xeev Tseej Hais. Muaj cov Hmoob ntseeg Kav Tos Liv tuaj koom txog li ntawm 11 thaj tsam.
Xib Hwb Ntshiab Neeb xeem Xyooj tus thawj coj lub koom haum Xib Hwb tshaj Ntuj Lus hauv Thaib teb thiab yog tus saib xyuas kev sib tw zaum no hais tias Hmong Catholic games xyoo no yog zaum 25 lawm. thawj zaug yog xyoo 1995, yog Txiv Plig Tshaj Sawm (Fr. Harry Thiel) tus txhim tsa tsev hauv paus Hmoob Tseej Maim tau tsa los rau cov ntseeg sawv daws ua kev lom zem, kom lawv paub koom siab koom ntsws, paub sib nyiam sib hlub thiab paub koom tes ua hauj lwm ua ke. Yog li thiaj tsa ncaj rau hnub Valentine day los yog hnub tim 14 lub 2 hlis.
Thaum chiv thawj mas muaj cov ntseeg ntawm tsev hauv paus Hmoob, zos Loom Poos (Longpong), Qhoom Kav (Khunklang) thiab Pam Oov (Pangung) xwb. Tom qab no mam muaj ntau lub zos pom txog qhov tseem ceeb, ces lawv thiaj tuaj koom ntaus zuj zus.
Nyob hauv xyoo no yog muaj kev sib tw 6 yam : 1. Ntaus pob ntawm cov txiv tsev, 2. Ntaus pob ntawm cov niam tsev, 3. Ntaus pob ntawm cov ntxhais hluas, 4. Ncaws pob tawb hiab ntawm cov hluas, 5. Ntaus qe hlau ntawm cov txiv tsev, thiab 6. Ntaus qe hlau ntawm cov niam tsev. Cov Hmoob tuaj sib tw zaum no muaj txog 11 qhov chaw tuaj : yog zos Maetala, Pongnoke, Pangung, Longpong, Khunklang, Ban Huai Siao, Ban Pha Dam, Banbuakjun, Ban Kheknoi, tsev kawm ntawv Mathanothai Tak thiab tsev hauv paus Hmoob Tseej Maim.
Xib Hwb Ntshiab Neeb thiab cov Xib Hwb Hmoob sawv daws tau caw Txiv Plig Coj Xeem tuaj ua thawj pwm tsav qhib kab ke sib tw zaum no. Tsis tas li xwb txawm muaj Txiv Plig Pob Zeb hauv tsev hauv paus Hmoob thiab Txiv Plig Udomsak Dihair coj cov ntseeg hauv zos Khej Me tuaj koom thiab.
Tus sau : Muas Lauj, Zoo Tswv Zov Yaj