HMOOV TSUJ XEEB TSEV TEEV NTUJ HAUV ZOS HMOOB

TP. Prasert tuaj ua Txoos teev Ntuj rau hnub ua hmoov tsuj xeeb lub tsev teev Ntuj hwm tus Neeg Ntshiab Nis Kos Las Npoos Kawm hauv zos Nav Xais.(Vam txog TP. Udomsak Dihair)

Monday, January 13, 2020

Hnub tim 11 lub 1 hlis 2020, Txiv Plig Prasert Sithi coj cov ntseeg hauv zos Nav Xais ua hmoov tsuj xeeb tsev teev Ntuj hwm Neeg Ntshiab Nis Kos Las Npoos Kawm.
Tsev teev Ntuj hwm Neeg Ntshiab Nis Kos Las Npoos Kawm (Nicolas Bunkerd Catholic Church) hauv zos Nav Xais txhim tsa xyoo 2006, thaum ntawd muaj cov kwv tij Hmoob ntseeg 10 yim xwb; niaj hnub no muaj cov kwv tij Hmoob hauv zos Nav Xais tig los ntseeg lawm 69 yim.

Txiv Plig Txawj Foom (Fr. Thossaphon Narinrak) tus Leej Choj saib xyuas lub tsev teev Ntuj no hais tias chiv thawj mas lub tsev teev Ntuj no lub npe hu tias ‘Tsev Teev Ntuj Hwm Yes Xus Khuv Leej Neeg’, tom qab no thiaj tau hloov ua tsev teev Ntuj hwm Neeg Ntshiab Nis Kos Las Npoos Kawm thiab coj lub tsev teev Ntuj hwm Yes Xus khuv leej neeg mus tso rau pem lub zos Nav Qhab.

Nyob hauv Txoos Teev Ntuj, Txiv Plig Prasert tau piav txog Neeg Ntshiab Nis Kos Las Npoos Kawm lub neej; Txiv Plig Prasert hais tias cov ntseeg hauv lub tsev teev Ntuj no yuav zoo siab vim thaj chaw no nyob ze rau qhov chaw tus Neeg Ntshiab Nis Kos Las Npoos Kawm tau tuaj tshaj lub Moo Zoo. Tos Txiv Plig Prasert hais li vim tus Neeg Ntshiab Nis Kos Las Npoos Kawm tau tuaj saib xyuas lub tsev teev Ntuj hwm Leej Ntshiab Nis Kos Las hauv xeev Phisanulok uas nyob tsis deb tsis ze lub zos Hmoob no, mas tej zaum nws yuav tau tuaj txog thaj chaw no thiab.
Txiv Plig Prasert hais ntxiv tias “Neeg Ntshiab Nis Kos Las Npoos Kawm nws coj lub neej raws Huab Tais Yes Xus lo lus qhia nyob hauv ntawv Moo Zoo nej tau hnov nyob hauv hnub no, yog : Kuv xa nej mus kom nej txi txiv, kom nej cov txiv nyob ruaj, kom xwv nej tuav txog kuv lub npe thov yam twg ntawm Leej Txiv, mas nws muab rau nej. Los lus qhia uas kuv muab rau nej yog kom nej sis nyiam sis hlub.” (Z 15 : 16-17)
Thaum kob rog ntuj zaum ob, cov tseem hwv Thaib tsim txom cov neeeg ntseeg, Txiv Plig Nis Kos Las Npoos Kawm raug ntes kaw hauv tsev loj faj. Nyob hauv tsev loj faj, nws tseem niaj hnub qhia Ntuj Lus rau cov neeg raug kaw kom lawv paub txog Huab Tais Ntuj txoj kev nyiam; txawm nws ntsib kev txom nyem thiab raug tsim txom nyob hauv tsev loj faj, los nws tsis tso txoj kev tshaj lub Moo Zoo vim nws coj nraim Huab Tais Yes Xus lo lus qhia ntawd.
Txiv Plig Nis Kos Las Npoos Kawm tau coj cov neeg raug kaw los hloov siab tshiab txog 66 leej, mas nws mam li tuag.

Txiv Plig Vicha thiab Txiv Plig Chaus hauv lub koom haum Leej Choj OMI pom txog Txiv Plig Nis Kos Las Npoos Kawm lub siab nyiam lwm tus thiab rau siab tshaj Ntuj Lus no, mas nkawd thiaj ua ntawv thov Vaj Qhia Zam Paj Lug Ob kom tsa nws ua Neeg Ntshiab. Xyoo 2000 Vaj Qhia Zam Paj Lug Ob thiaj tsa Txiv Plig Nis Kos Las Npoos Kawm ua tus Neeg Ntshiab Nis Kos Las Npoos Kawm nyob hauv Vas Tis Kas.
Txiv Plig Prasert ntuas sawv daws tias “Peb yuav tsum coj tus yam ntxwv zoo li tus Neeg Ntshiab pov hwm lub tsev teev Ntuj no : Neeg Ntshiab Nis Kos Las Npoos Kawm.”

Tus thau duab : TP. Udomsak Dihair
Tus sau : Muas Lauj, Zoo Tswv Zov Yaj