HMOOV TSUJ XEEB TSEV TEEV NTUJ HWM LEEJ NTSHIAB PAJ LUG HAUV ZOS FIB XAIM

Hnub tim 29 lub 2 hlis tas los no, cov ntseeg hauv zos Fib Xaim, xeev Phib Xas Nub Loj, Thaib teb tau ua hmoov tsuj xeeb txhim tsa tsev teev Ntuj hwm Leej Ntshiab Paj Lug txwm 39 xyoos. Muaj Tswv Qhia Yos Xes Phib Npoos tuaj ua tswv cuab coj sawv daws teev Ntuj.
Tim 29 lub 2 hlis xyoo 2020 no, Tswv Qhia Joseph Phibul Visitnonthachai tus tswj Cheeb Koom Txoos Nakhornsawan, Thaib teb tuaj ua tswv cuab coj cov ntseeg hauv zos Fib Xaim ua Thaj Txi Ntuj nyob rau hnub ua hmoov tsuj xeeb tsev teev Ntuj hwm Leej Ntshiab Paj Lug.
Tswv Qhia ntuas cov ntseeg sawv daws tias Leej Ntshiab Paj Lug yog tus tub tshaj Ntuj Lus nto npe thiab yog tus piv txwv rau peb sawv daws. Nyob hauv ziag no los tau muaj thawj tus Leej Choj haiv neeg Hmoob nyob hauv lub Cheeb Koom Txoos no lawm. Nws raug xa mus tshaj Ntuj Lus rau cov haiv neeg Hmoob nyob toj siab, nws coj cov me nyuam Hmoob los kawm hauv tsev kawm ntawv. Nyob hauv lub zos no los yeej tau Ntuj txiaj ntsim tib yam nkaus, vim tau muaj ib tus Txiv Plig (TP. Txhiaj Foom) tau tuaj tshaj txoj kev ntseeg thiab ua Cim Ntxuav rau cov ntseeg tshiab 20 tawm leeg ua ntej nws yuav rov qab mus tsev. Yog li cov pej xeem hauv lub zos no feem ntau thiaj yog cov ntseeg.
Tswv Qhia hais ntxiv tias txawm peb hloov siab tshiab lawm los, peb txhob tso peb Hmoob kev cai pov tseg. Hmoob kev cai los yeej qhia kom hwm niam hwm txiv tib yam li cov ntseeg thiab, ntseeg tias muaj ntuj txias teb tsaus tib yam. Yog li peb txhob muab tej kev ntseeg sib txawv no los ua kev tsis sib haum xeeb. Peb yog cov ntseeg, mas peb txhob tso txoj kev pab lwm tus tseg. Peb cov ntseeg yuav tsum tsob hwb lwm tus, yuav tsum pab cov neeg txom nyem.
Tsis tas li ntawd Tswv Qhia tseem hais tias haiv neeg Hmoob yog ib haiv neeg Tswv Ntuj foom hmoov zoo rau, yog li peb yuav tsum ua Ntuj tsaug tas mus li.
Tom qab Thaj Txi Ntuj lawm, Vam Khwb Yaj tus coj cov ntseeg hauv zos Fib Xaim tau piav txog lub tsev teev Ntuj no tias yog txhim tsa xyoo 1981, thaum ntawd muaj 1 yim neej xwb, tiam sis ziag no muaj txog 940 leej lawm. Tab sis feem ntau mas sawv daws txawm tsis tau txais Cim Ntxuav.