Hnub Chiv Tim 21 Lub 3 Hlis 2021

Hnub Chiv Tim 21 Lub 3 Hlis 2021

Lub Caij Plaub Caug 5

Zam Ntawv Moo Zoo 12:20-33

Lub lis piam no yog lub lis piam kawg lawm nyob hauv lub caij plaub caug. Hnub chiv yav tom nej yog hnub chiv ua cov kab ke nqaum nplooj lawm. Peb yuav npaj siab nco ntsoov txog Yes Xus taug txoj kev txom nyem nyob hauv lub lis piam ntshiab.

Kuv xav hais txog ib zaj lus uas Zam Ntawv Moo Zoo hais txog. Yog Yes Xus hais tias “Yog lub noob nplej tuag mas nws yuav txi txiv ntau. Tus neeg nyiam nws txoj sia, nws yuav ua nws txoj sia ploj. Hos tus nws ntxub nws txoj sia nyob hauv sim ceeb no, mas nws txuag nws txoj sia kom nyob mus li.” Yes Xus qhia qhov tseeb rau sawv daws tias yus yuav tsum muaj txoj sia rau luag, tsis yog rau yus tus kheej xwb. Qhov no yog kev tseeb hauv txoj sia. Thaum peb yug los, peb muaj txog sia nyob rau luam. Qee leej muaj txoj sia nyob rau nws tsev neeg, nyob rau leej niam leej txiv, rau kwv tij neej tsa, rau yus tus hlub, los rau me tub me nyuam. Tsis muaj leej twg muaj txoj sia nyob rau nws tus kheej ib leej xwb. Ib tug neeg tsuas xav txog yus tus kheej xwb hu tias “neeg qia dub.” Kuv xav tias peb sawv daws tsis muaj leej twg xav tau lub npe tias yog neeg qia dub puas yog? Vim tias tsis muaj leej twg xav nrog nws ua phooj ywg.

Yes Xus qhia peb ib qhov tseem ceeb uas peb muaj nyob hauv peb lub siab tias peb muaj kev zoo nyob hauv peb lub siab. Ib tug neeg kws txuj hais tias puag thaum ub, nyob hauv cov neeg lub siab tsuas muaj kev zoo xwb. Nws ntseeg tias cov neeg yug los muaj kev zoo nyob huav nws tus kheej. Peb yuav tsum ua kev zoo ntxiv mus. Yes Xus caw peb kom peb yog ib lub noob nplej uas txi txiv ntau. Peb yuav tsum tuag, peb mam txi txiv ntau. Hais txog “tuag” los “kev tuag,” kuv tsis xav hais tias yus yuav tua yus tus kheej. Tab sis kev tuag kuv hais txog no nws muaj lub ntsiab tias peb yuav tuag rau kev txhaum kev tsis zoo, kev tsis ncaj ncees, thiab tig rov los tawg paj txi txiv hauv txoj kev zoo hauv cov kwv tij sawv daws. Ua li no peb kuj yog ib lub noob nplej uas txi txiv ntau.

Thov kom Tswv Ntuj pub txiaj ntsim pab nej ua neej txawj tawg paj txi txiv lawm yav tom ntej mog.