IB TUG TXIV PLIG YES XUS IS RAUG NTES NYOB IS NTIAS

Hais txog ib tug Txiv Plig raug ntes nyob Is Ntias teb, mas tseem muaj kev sib tawm tsam tas zog. Tus Txiv Plig uas raug ntes ntawd yog ib tug Txiv Plig nyob hauv lub Koom Haum Yes Xus Is thiab nws yog ib tug Txiv Plig laus lawm. Nws lub npe hu ua Txiv Plig Xas Vas Mis (Rev. Swamy). Cov neeg ntseeg Kav Tos Liv nyob hauv lub xeev Thas Mis Nas Dus (Tamil Nadu) uas yog lub xeev Txiv Plig Xas Vas Mis yug los thiab loj hlob, sawv daws thiaj sib koom ua ib thaj txi Ntuj thov kom Txiv Plig Xas Vas Mis lub cev ntaj ntsug noj qab nyob zoo, vim tam sim no Txiv Plig lub hnub nyoog muaj 84 xyoos lawm. Tswv Qhia Aas Tos Nis Pos Pus Xas Mis (Bishop Antony Poppusamy) nyob Mas Ntus Lais (Madurai) qhuas tias Txiv Plig Xas Vas Mis yog ib tug neeg siab tawv thiab thov kev ncaj ncees rau tsoom pej xeem uas raug caij tsuj xws li cov Ntas Lis.

Tsis tas li ntawd, hnub tim 18 lub 10 hli 2020 no, hauv lub xeev Ntshas Qhaas (Jharkhand) uas nyob sab hnub tuaj, yog lub xeev uas Txiv Plig Xas Vas Mis ua hauj lwm, mas cov neeg ntseeg nyob txhua txhia qhov chaw thiab ib cov tub tseev tsim tau sib sau tawm tsam khaj cai thov kev ncaj ncees, yam li thov kom tso Txiv Plig Xas Vas Mis sai li sai tau thiab thim lo lus hais tias : “Nws raug txwv raug kaw, vim nws ua hauj lwm pab cov neeg raug caij tsuj”.

Kev khaj cai kuj muaj sib tawm tsam nyob hauv Online thiab thoob teb chaws, kom tau txhawb nqa Txiv Plig Xas Vas Mis txoj kev raug ntes. Txiv Plig Xas Vas Mis raug ntes nyob hauv Npas Kais Chas (Bagaicha) uas yog cov Yes Xus Is lub tuam tsev nyob hauv lub nroog Laas Ntshis.

Cov tub tseem hwv fab tiv thaiv kev nyiag tsim kev kub ntxhov (N.I.A), yog cov ntes Txiv Plig Xas Vas Mis. Lawv hais tias : Txiv Plig muaj feem cuam koom tes nrog cov neeg ntxeev siab, thiab koom ua tus txha nqaj qaum ntawm kev kub ntxhov nyob hauv lub zos Npis Mas Kos Les Nkas Oos (Bhimakoregaon), lub xeev Mas Has Las Tas (Maharashtra), lub 1 hli xyoo 2018. Ua rau neeg tuag 1 leeg thiab raug mob coob leej. Ua ntej thaum Txiv Plig yuav raug ntes, mas nws tau tso ib co xyam (Video) hais txog kev taij thov kev ncaj ncees ntawm nws tus kheej pab rau cov neeg raug quab yuam caij tsuj thiab raug txeeb lawv li av.