KEV TXUAG TIB NEEG KEV NCAJ NCEES THIAB KEV QHUAB QHIA

Cov Leej Choj hauv Amazon tau sib tham ntau zaus txog kev ua neeg thoj nam thiab raug caij tsuj, sib tham txog teeb meem ntawm kev qhuab qhia cov npaj siab ua Txiv Plig, cov Txiv Plig thiab cov Leej Tsob Hwb, tham txog kev quab yuam caij tsuj ntawm cov haiv neeg tsawg, vim lawv xav txuag lawv tej av. Kev ntov hav zoov, yog kev ua kom xyoob ntoo piam sij uas yog tsis haum rau lub Koom Txoos cov lus qhia. Vim li ntawd, sawv daws thiaj muaj feem cuam yuav nrhiav kev daws neeg lub tswv yim kom txawj txhim kho thiab txhob ntov hav zoov. Tus pwm tsav fab xov xwm nyob Vas Tis Kas hais tias : qhov uas thov kom muaj txoj kev txhim kho tshiab no, vim yog tsoom neeg ntseeg uas tsis muaj lub dej siab txuag xyoob ntoo, tsis muaj kev teev Ntuj, tsis koom ua thaj txi Ntuj, tsis muaj kev ua hauj lwm tshaj Ntuj Lus, ua rau lwm pab neeg tsis pom cov neeg no mus nrog luag sib koom ua hauj lwm tas niaj tas xyoo.

Vim li ntawd, thiaj yuav tsum txhib sawv daws kom muaj kev qhuab qhia, kom muaj cov Leej Tsob Hwb ua tus sawv cev nyob hauv tej zej zog pab sawv daws. Tso lus rau cov neeg laus uas sib yuav lawm, kom lawv qee leej muaj cai ua Txiv Plig, tab sis yog ua li no ntshe cov Txiv Plig yuav muaj tsawg zuj zus thiab yuav tsis muaj neeg los coj lub thaj txi Ntuj. Sawv daws yuav soj ntsuam kom paub lub ntsiab txog tej xyoob ntoo hav zoov thiab kev ua Txiv Plig. Yuav soj ntsuam txog nws txoj kev ntshiab huv nyob hauv lub Koom Txoos Kav Tos Liv. Hais txog kev qhuab qhia ntawm lub Koom Txoos muaj 3 nqe xws li : (1) Qhuab qhia kom cov ntseeg lub tswv yim nthuav dav thiab vam meej, yam li nyeem thiab txawj nco txog Tswv Ntuj cov Lus. (2) Kev qhuab qhia nruj nruj hais txog cov neeg yuav los ua thawj coj. (3) Qhuav qhia cov npaj los ua tub tshaj Ntuj Lus thiab cov xib hwb uas yuav los ua hauj lwm rau lub Koom Txoos tiag. Hais txog 1119 tus neeg uas tau tag sim neej nyob hauv xyoo 2003 txog xyoo 2017, uas lawv tau tuag vim lawv muab lawv txoj sia los pov hwm lawv daim av. Lub Koom Txoos yuav tiv thaiv thiab pab txuag cov neeg uas raug caij tsuj los sis poob hauv txoj kev tsis ncaj ncees, vim lawv yog cov tsis pom zoo ntov hav zoov. Yuav sib koom tes nyob hauv kev tseev tsim thiab kev lag luam, tsis txhob ua ib co neeg tsis muaj nuj nqis thiab pab txhawb nqa tej lub Koom Haum me me uas ua tsis tau dab tsi. Hauv txhua lub rooj sab laj, mas tau hais txog cov neeg thoj nam, cov tub ntxhais hluas uas tsis muaj hauj lwm ua, kev ua luam neeg, kev caij tsuj, kev quav yeeb quav tshuaj thiab kev ua niam ntiav. Lub Koom Txoos yuav paub txog qhov muaj nqis ntawm txhua yam hais los no, yuav txhawb nqa thiab ua kom cov tub ntxhais hluas muaj kev sib koom tes nyob hauv lub Koom Txoos. Vim cov tub ntxhais hluas yog cov yuav ua zoo thiab ua tim khawv ntawm sawv daws txoj kev cia siab.

Tus txhais : Zoo Tswv Zov Yaj