KOOM TXOOS KAV TOS LIV COV HAUJ LWM NYOB HAUV NPAAS KOJ

Muaj ib thaj chaw uas sib kis tus kab mob Covid-19 loj tshaj nyob hauv tuam ceeb Npaas Koj, mas yog qhov chaw uas cov neeg txom nyem nyob coob coob sib ti hauv plawv nroog. Tab txawm tias tus kab mob sib kis nyob hauv Shantytown uas muaj tsoom pej xeem nyob li ntawm 90,000 leej, tsis kav Mercy Center uas yog qhov chaw txais cov me nyuam ntsuag thiab muaj ntau lub tsev rau cov me nyuam ntsuag kawm ntawv nyob Npaas Koj kuj tseem tsis tau muaj tus kab mob sib kis, thiab lawv tseem qhib txais cov me nyuam ntsuag xws li qub.
Txiv Plig Joseph Myers hais tias tab txawm peb nyob sib ti zoo li cov neeg mag kaw xwb, tsis kav sawv daws muaj lub cev ntaj ntsug khov kho. Txiv Plig Myers yog ib tug Txiv Plig nyob hauv Koom Haum Tus Cawm Seej, nws tuaj ntawm As Mes Lis Kas teb tuaj. Nws ua hauj lwm nrog ib tug Leej Phauj Chathava uas yog cov Leej Phauj Kav Tos Liv. 50 tawm xyoo lawm uas Txiv Plig Myers ua hauj lwm nyob Thaib teb thiab sawv daws paub nws lub npe hu ua Txiv Plig Joe. Nws ua ntau yam hauj lwm pab cov neeg pluag txom nyem nyob hauv thaj tsam Klongtoey. 
Mercy Center qhia ntau yam rau cov me nyuam nyob hauv ntau thaj tsam hauv nroog Npaas Koj nrog rau cov neeg khaws toob xib. Tsis tas li ntawd, Mercy Center tseem nrhiav kev pab cov poj niam raug quab yuam tsim txom los ntawm tsev neeg thiab lwm tus neeg, cov quav tshuaj thiab lwm yam. 
Kev sib kis tus kab mob zaum 3 nyob Thaib teb, mas pom tau tias cov neeg mob coob kawg nyob hauv 2-3 lub lis piam dhau los. Mercy Center tau muab siab rau soj ntsuam txog cov neeg uas lawv saib xyuas seb puas noj qab nyob zoo.