KOOM TXOOS NYOB THAIB TEB UA HMOOV TSUJ XEEB TXWM IB XYOOS VAJ QHIA TUAJ TSHAM

Friday, December 11, 2020

Hnub tim 22 lub 11 hlis 2020, lub Koom Txoos Kav Tos Liv ua hmoov tsuj xeeb nco txog Vaj Qhia tuaj tsham Thaib teb txwm ib xyoos. Lub txoos teev Ntuj yog ua nyob hauv hnub qhib xyoo cov tub ntxhais hluas nyob hauv lub teev teev Ntuj Assumption. Lub Koom Txoos yuav npaj kom muaj cov tub ntxhais hluas tuaj sib koom thiab muaj kev sib faib kev ntseeg. Ua kom cov tub ntxhais hluas lawv lub siab kub luag txog txoj kev sib koom ua hauj lwm nyob hauv lub Koom Txoos. Kom cov tub ntxhais hluas muaj kev cia siab nyob hauv lawv txoj kev ntseeg thiab maj mam hlob zuj zus. Lub Koom Txoos lub luag hauj lwm yog nrog cov tub ntxhais hluas mus ua ke, ib yam li Huab Tais Yes Xus nrog nws cov Thwj Tim mus ua ke. Kom cov tub ntxhais hluas tau ua ib tug phooj ywg sawv nrog Huab Tais Yes Xus ua ib ntxaig tiag tiag. Hnub ntawd thaum sawv ntxov pib ua cov kab ke muaj Tswv Qhia Sriphung tus coj tsoom tub ntxhais hluas kwv ntoo cuam ua lub cim tias yog xyoo ntawm cov tub ntxhais hluas ncig lub tsev teev Ntuj raws Vaj Qhia tus piv txwv thaum tuaj tsham Thaib teb.

Hnub ntawd muaj Tswv Qhia Frangsis Xavier Khrieng Sakkhovi ua tswv cuab coj lub thaj txi Ntuj ua Tswv Ntuj tsaug uas tau pub Vaj Qhia Fas Ntshis Kus tuaj tsham Thaib teb tsaib no. Lub thaj txi Ntuj yog nco txog Vaj Qhia tuaj tsham Thaib teb txwm ib xyoos thiab yog qhib lub xyoo ntawm cov tub ntxhais hluas. Lub thaj txi Ntuj muaj lub ntsiab lus hu ua “Huab Tais Yes Xus tus phooj ywg” (Journey Together with Christ).

Muaj kev pub ntoo cuam rau tsoom tub ntxhais hluas ua ib lub cim tias sawv daws nrog Huab Tais Yes Xus ua ke. Lub Koom Txoos Kav Tos Liv nyob Thaib teb thiab tsoom tub ntxhais hluas yuav ua ke lis lub Koom Txoos cov dej num. Kom txoj kev ntseeg nyob Thaib teb thiab tsoom tub ntxhais hluas vam meej nyob hauv txhua lub Cheeb Koom Txoos. Thiab txhua lub Cheeb Koom Txoos yuav nco tias Niam Mab Liab nrog nraim sawv daws thiab Niam Mab Liab yog tus thov Ntuj lub txiaj ntsim pub rau tsoom tub ntxhais hluas. Vim Huab Tais Yes Xus tau muab Niam Mab Liab los ua peb sawv daws niam, ces Niam Mab Liab yuav thov Ntuj lub txiaj ntsim thiab pab txuag tsoom tub ntxhais hluas. Hnub ntawd thaum yav hnub qaij, tsoom tub ntxhais hluas sib sau nyob hauv lub tsev kawm ntawv Assumption, nyob Bangrak. Tsoom tub ntxhais hluas tau sib koom ua ntau yam kev lom zem ua ke los tsuj xeeb cov tub ntxhais hluas xyoo. Kev lom zem no hu ua “Lub suab ntawm cov tub ntxhais hluas “ (Youth Voice). Muaj 5 tug tub hluas uas lawv paub qab hau me ntsis los faib lawv txoj kev ntseeg rau sawv daws. Yam li tsis hais nyob hauv txoj kev noj qab nyob zoo, txoj kev ntxhov siab thiab raug xwv txheej, lub caij muaj kev zoo siab thiab muaj kev nyuab siab, lawv muaj Huab Tais Yes Xus nrog nraim lawv. Vim li ntawd lub ntsiab lus thiaj yog Journey Together with Christ. Cov neeg ntseeg Thaib tau ua ib lub cim txog Vaj Qhia lo lus uas nws tau hais nyob hauv phau ntawv Chritus Vivit hais txog cov tub ntxhais hluas thiab lub Koom Txoos xyoo 2021.