LEEJ NIAM HNUB HAUV TSEV TEEV NTUJ HWM LEEJ NTSHIAB PAJ LUG, ZOS FIB XAIM.

Tim 12 lub 8 hli yog ib hnub tseem ceeb nyob hauv Thaib teb vim yog hnub ua hmoov poj vaj ntxwv Thaib tim 9 hnub yug thiab yog hnub nom tswv Thaib tsa ua ‘Leej Niam Hnub’.
Hnub no, tsev teev Ntuj hwm Leej Ntshiab Paj Lug hauv zos Fib Xaim, xeev Phib Xas Nub Loj thiaj koom tes nrog tsev tshaj Ntuj Lus ‘Zoo Tswv Zov Yaj’ tsa kab ke hwm niam rau ntawm tshav noj mov hauv tsev teev Ntuj rau cov me nyuam tuaj hawm lawv leej niam thiab faib toob xib rau cov laus.
Txiv Plig Oos Am (Fr. Ongart Kaser) tus Leej Choj tswj lub tsev teev Ntuj ua tus thawj pwm tsav qhib kab ke hais tias : Nyob hauv haiv neeg Thaib mas lo tias ‘niam’ yog ib lo muaj tsim thiab loj tshaj txhua lo. Thaum haiv neeg Thaib yuav hais txog tej yam loj uas muaj txiaj ntsim rau tib neeg mas yuav muab lo ‘niam’ pib ua ntej; xws li ‘niam dej’, ‘niam av’.
Cov me nyuam yaus tau los hu ib zaj nkauj pub rau cov ua niam yog zaj ‘niam lub chaw sov’, lus Thaib yog ‘Im-un’. Dhau ntawd cov ntseeg tau ua ib pluas mov rau sawv daws koom noj ua ke ua ntej nyias yuav rov mus nyias tsev.