Lub Cheeb Koom Txoos Can Tho pab tsoom pej xeem tiv thaiv kab mob

Cov zej zog nyob ntawm ntug dej Naj Khoom muaj cov hauj lwm pab dawb thiab qhia kev ntseeg nyob hauv Online. Tswv Qhia Tri Buu Thien xav pom cov neeg ntseeg loj hlob thiab vam meej, ces lub Cheeb Koom Txoos Can Tho thiaj qhib qhia kev ntseeg Online rau cov me nyuam yaus thiab cov laus, kom lawv paub kev ntseeg thiab koom nrog cov neeg ntseeg ua cov hauj lwm sib pab nyob hauv lub caij muaj tus kab mob COVID-19 sib kis no.

Vim li no Txiv Plig thiaj sau ntawv tshaj Ntuj Lus rau cov neeg ntseeg txhua qhov chaw nyob hauv lub Cheeb Koom Txoos. Lub Cheeb Koom Txoov kav tas feem ntau hauv thaj tsam 3 ceg niaj dej Naj Khoom uas muaj tsoom pej xeem nyob li ntawm 5.58 plhom leej. Cov neeg ntseeg Kav Tos Liv yog 191,000 leej nyob hauv 139 lub zos thiab 19 qhov chaw tshaj Ntuj Lus.

Tam sim no thaj tsam no tab tom raug tus kab mob COVID-19, ua rau cov neeg mob Coronavirus tshiab txhab ntxiv li ntawm 13,000 leej nyob hauv lub Cheeb Koom Txoos Can Tho, thiab muaj neeg tuag ze ntawm 300 leej lawm. Tab sis lub Koom Txoos nyob raws zej zog kuj maj mam qhia kev ntseeg ntxiv mus, vim kev qhia kev ntseeg nyob hauv tej zej zog raug tu ncua los ntev. Tswv Qhia Tri Buu Thien sau ntawv tias :

“Peb kuj tsis paub tias yuav qhib qhia kev ntseeg tau hnub twg, kom thiaj pab tau Tswv Ntuj cov neeg fab ntsuj plig, tab sis lub Cheeb Koom Txoos yuav qhib qhia kev ntseeg nyob hauv Online. Yuav qhia kom cov neeg laus txawj coj lub neej mus raws kev ntseeg ib yam li cov nkawm niam txiv uas tab tom npaj sib yuav. Txawm tias cov tsis yog neeg ntseeg los kuj tuaj yeem koom tau.

Peb yuav ua kom txhua yim neeg lub tsev hloov los ua tsev teev Ntuj, kom txhua yim neeg ua lub neej mus taug txoj kev sib nyiam sib hlub thiab pab luag tej, nquag nyeem ntawv Ntshiab ua ke thiab nqua teev Ntuj txhua hnub”