LUB TEB CHAWS NIS KAS LAS KUAS (Nicaragua).

Hnub tim 9 lub 7 hli xyoo 2019 no, tus tiam lis uas yog tus Tswv Qhia Liab Npes Nes thiab tus lwm Tswv Qhia Khos Tshej raug ib pab neeg uas nyiam tus Txoov Tim Tswv Nis Kas Las Kuas saib tsis taus nkawd, pab neeg ntawd xuas ntaub npog ntsej muag thiab hiam nkawd. Tswv Qhia Liab Dis Nas Les Os hais tias ; nws raug pab neeg ntawd ntaus nws txhais caj npab thiab ntaus nws plab, pab neeg ntawd txeeb Tswv Qhia tus ntoo cuam ntawm nws caj dab mus lawm. Nws hais ntxiv hais tias : tsis muaj dab tsi, lub qhov txhab no piv zoo li cov neeg Nis Kas Las Kuas txoj kev txom nyem xwb. Yus yog ib tug Tswv Qhia, yus yuav txawj xam pom tej yam tsis zoo no yog nyob ntawm yus tes. Yus tuaj yeem ntsia pom cov tub sab tua neeg uas lawv kav Nis Kas Las Kuas teb zim txwv no thiab yus paub tias yog leej twg.

Tseem muaj cov Tswv Qhia coob leej yog lub hom phiaj ntawm cov neeg phem kev saib tsis taus thiab caij tsuj. Txhua yam no peb tiv thaiv tau ntawm lo lus zoo thiab kev ua zoo, yog tias yus xav nrhiav kev thaj yeeb. Tab sis yog siv lub zog thiab ua phem, mas kawg tuag xwb. Yog vim li ntawd, lub Koom Txoos thiaj ib txwm tiv thaiv kev quab yuam thiab iab hiam li ntawd los. Tiv thaiv kev kub ntxhov quab yuam neeg thiab kev khav theeb caij tsuj luag tej. Txij 4 lub hlis ntuj los, cov tub rog thiab cov neeg uas tuaj tus Txoov Tim Tswv Nis Kas Las Kuas Das Nias, raug tsoom pej xeem khaj cai tawm tsam hnyav kawg. Tab txawm tsoom pej xeem tuag 309 leeg thiab raug mob ntau pua leej, tsis kav tsoom pej xeem tsis thim thiab lawv khaj cai nyob puv hauv tej kev. Lub Koom Txoos xav cev tes mus pab daws teeb meem, tab sis cov tseem hwv tsis kam, lawv hais tias yuav cia tsoom pej xeem ua li ntawd mus txog hnub tsoom pej xeem tso tseg. Hnub tim 21 lub 6 hli, tus tiam lis thiab tus Tswv Qhia Liab tau mus rau tham tsam uas tsoom pej xeem khaj cai hnyav, vim nkawd xav mus daws cov teeb meem ntawd kom ob tog sib haum xeeb. Tus tiam lis thiab tus Tswv Qhia Liab cheem kom cov tub rog txhob tua neeg ua dog dig, nkawd nqa lub Cim Yug ntawm tes thiab foom hmoov zoo rau sawv daws. Tus tiam lis thiab tus Tswv Qhia Liab hais tias : “Wb tau pom kev kub ntxhov 2 zaug dhau los, thiab ua rau neeg tuag 5,000 tawm leej, tab sis puav leej yog cov tub rog tuav riam phom nrog cov ntxeev siab muaj riam phom sib tua, nws tsis yog nrog tsoom pej xeem uas tes dawb tes do nyob ntawm tej ntug kev sib tua. Cov pej xeem muaj tug puav tsuas yog nkaum ntawm tej ntsa laj kab thiab tuav tej lub pob zeb xwb. Vim li ntawd, txoj kev kub ntxhov thiaj ntxhov quav niab heev dua tsov rog txeeb teb chaws.

Hnub tim 11 lub 5 hlis, Vaj Qhia tau sau ib tsab ntawv rau tus Txoov Tim Tswv Nis Kas Las Kuas Das Nias tias : “Tsis muaj qhov tias lig hais txog kev zam txim thiab rov sib haum xeeb”. Vaj Qhia thov kom tso tseg kev tsim kev kub ntxhov, vim kev tsim kev kub ntxhov ua kom neeg sib tawg thiab tsoom pej xeem txom nyem dua qub xwb.

Tus txhais : Lis Maib, Zoo Tswv Zov Yaj