MUAJ PEB TUG TSWV QHIA KHAJ CAI HAIS TXOG TSEEM HWV TSIS MUAB NYIAJ HLI RAU COV XIV HWB QHIA NTAWV

Muaj 3 tug Tswv Qhia koom siab khaj cai, yam li lawv yoo mov 3 hnub sib law nyob hauv lub xeev Kes Las Las (Kerala), yog vim cov tseem hwv tsis muab nyiaj hli rau cov xib hwb uas lawv qhia ntawv nyob hauv cov tsev kawm ntawv Kav Tos Liv nyob Is Ntias teb. Tswv Qhia Mas Lias (Bishop Maria Callist Susapagiam) uas nyob This Lus Vas Naas Thas Npus Las (Thiruvananthapuram) piav lub ntsiab ntawm kev khaj cai tias : tos cov Tswv Qhia khaj cai zoo li ntawd, yog vim nyob hauv 5 xyoos tag los no, muaj 3,000 tawm tus xib hwb qhia ntawv nyob hauv cov tsev qhia ntawv Kav Tos Liv zwm rau tseem hwv, mas lawv tsis tau txais nyiaj hli kiag li.

Dhau ntawm 3 tug Tswv Qhia ntawd lawm, tseem muaj 2 tug neeg ntseeg koom nrog 3 tug Tswv Qhia khaj cai thiab. Muaj 14 thaj tsam nyob hauv lub xeev Kes Las Las tib txhij khaj cai ua ke. Lawv hais tias tseem hwv txwv txiav lawv, vim lawv yog haiv neeg tsawg nyob hauv ib txoj kev teev hawm. Tseem hwv hais tias lawv ua tswv ntawm cov tsev kawm ntawv, lawv ua ywj lawv siab thiab lawv daws kho tseem hwv txoj cai. Tam sim no lub Koom Txoos Kav Tos Liv muaj cov tsev qhia ntawv nyob Kes Las Las 5,000 lub. Tag nrho cov tsev qhia ntawv nyob Kes Las Las muaj 13,000 lub. Tsuas muaj cov tsev qhia ntawv Kav Tos Liv ib nrab xwb thiaj tau txais nyiaj hli ntawm cov tseem hwv.

Tsoom pej xeem Is Ntias muaj tas nrho 1,300 tawm plhom leej, cov neeg ntseeg tsuas yog 2 feem pua xwb. Nyob hauv lub xeev Kes Las Las muaj tsoom pej xeem 33 plhom leej, tab sis cov neeg ntseeg tsuas yog 18 feem pua.

Txiv Plig Sas Lis Oos (Fr. Charles Leon) uas yog tus lwm thawj tswj ntawm KCBC hais tias : kev khaj cai pib nyob hauv hnub 2 ntawm lub lis piam, ces tam sim no kev khaj cai ri mus thoob plaws lub xeev Kes Las Las. Hais txog cov tsev kawm ntawv ntawm cov haiv neeg tsawg, mas yog ib yam uas cov tseem hwv ua tsis ncaj ncees. Vim tseem hwv txiav kev pab nyiaj hli los tau 5 xyoos lawm.